"Teraktla bağlı bəzi dəlillər əldə etmişik"

Türkiyədə keçirilən Milli Təhlükəüsizlik Şurasının iclası başa çatdı .
Mehmet Müezzinoğlu, Əfqan Ala və Bekir Bozdağ - səhiyyə, daxili işlər və ədliyyə nazirləri
Mehmet Müezzinoğlu, Əfqan Ala və Bekir Bozdağ - səhiyyə, daxili işlər və ədliyyə nazirləri

Türkiyənin paytaxtı Ankarada baş vermiş terror hadisəsindən sonra baş nazir Əhməd Davudoğlunun rəhbərliyində Milli Təhlükəüsizlik Şurasının iclası keçirilib. ANS PRESS-in məlumatına görə, təxminən 1 saat 20 dəqiqə davam edən iclasdan sonra daxili işlər naziri Əfqan Ala və səhiyyə naziri Mehmet Müezzinoğlu mətbuata açıqlama verib.

Nazir Əfqan Ala terrorçuların heç bir vaxt öz hədəflərinə çata bilməyəcəyini, terrorla mübarizənin davam edəcəyini deyib. Nazir həmçinin, faktla bağlı bəzi məlumatlar əldə etdiklərini, ətraflı açıqlamanın araşdırmalar başa çatdıqdan sonra veriləcəyini bildirib. 

“Partlayıcı yüklənmiş avtomobillə mülki əhaliyə qarşı terror hasdisəsi törədilib. Bu teraktı hamılıqla lənətləyirik və bunu törədənlərin heç bir vaxt öz məqsədlərinə çata bilməyəcəklərini vurğulayaraq bir daha deyirik: Bu millətin əzmkarlığını və qərarlığını yox edə bilməyəcəksiniz.  

İndiyə qədər aparılan araşdırmalarda bəzi dəlillər əldə olunub. Amma hadisəni törədən qruplaşma bütün dəlillər dəyərləndirilib araşdırmalar başa çatdıqdan sonra açıqlanacaqdır. Hesab edirəm ki, bu araşdırmalar sabaha nəticələnəcək. Dəqiq qənaət hasil olduqdan sonra açıqlama veriləcək. 

Sözsüz ki, bu baş verənlərdən sonra; millətin dincliyi, ölkəmizin birliyi və bütövlüyü üçün həyata keçirilən terrorla mübarizədə dayanma olmayacaq. Heç bir vaxt bu cür teraktlar terrorla mübarizədə göstərdiyimiz qərarlılığın qarşısını almayacaqdır. Terror bu ölkənin ayağına buxov olmadan zərərsizləşdiriləcək.    

Dünyasını dəyişən vətəndaşlarımıza Allahdan rəhmət diləyirik. Onlar bizim şəhidlərimizdir. Yaralılara təcili şəfa arzulayıram. Demək istəyirəm ki, təhlükəsizlik və dinclik üçün apardığımız mübarizə davam edəcək və nəticə əldə olunacaq.

Türkiyənin yolunu kəsməyə çalışanlar buna müvəffəq ola bilməyəcəklər.” – deyə Türkiyənin DİN rəhbəri vurğulayıb.  

Səhiyyə naziri Mehmet Müezzinoğlu isə terakt nəticəsində ölənlərin və yaralananların sayını açıqlayıb.

“Millətimizin başı sağolsun. Yaralılarımıza təcili şəfa arzulayıram. Hadisə vaxtı 34 nəfər dünyasını dəyişib. 125 yaralının müalicəsi davam edir. 19 nəfərin vəziyyəti ağırdır. 7 yaralı hazırda əməliyyat olunur. Digər yaralıların əksəriyyəti isə ambulator müayinədən sonra evə buraxılacaqlar. Müalicəsi davam edən yaralılar da olacaq. 

Hadisədən 1,5-2 dəqiqə sonra təcili yardım xidməti yaralılara müdaxilə edib. Hazırda 14 xəstəxanamızda yaralılar var. Alo-184 qaynar xəttindən məlumat əldə etmək olar. Terror hadisəsi vaxtı 30 nəfər hadisə yerində, 4 nəfər xəstəxanalarda ölüb. 30 nəfərdən ən azı 1 və ya 2 nəfərin teraktı törədənlər olduğunu güman edirik.

Bu terror hadisəsini lənətləyirəm. Hadisəni törədənlər onsuzda gedəcəkləri yerə getdilər. Allah İnşallah bir daha bu milləti bu cür fəlakətlərlə qarşılaşdırmasın.” – deyə səhiyyə naziri bildirib. 

 

Şərhlər