İlham Əliyev və Medvedev Qarabağ münaqişəsini müzakirə etdi

Prezident və Medvedev mətbuata bəyanatla çıxış ediblər.
Rusiyanın baş naziri Dmitri Medvedev və prezident İlham Əliyev arasında görüş
Rusiyanın baş naziri Dmitri Medvedev və prezident İlham Əliyev arasında görüş

Nümayəndə heyətlərinin iştirakı ilə geniş tərkibdə görüş başa çatdıqdan sonra Azərbaycan prezidenti İlham Əliyev və Rusiya Hökumətinin sədri Dmitri Medvedev mətbuata bəyanatlarla çıxış ediblər.

ANS PRESS-in məlumatına görə, prezident İlham Əliyev  bildirib ki, Medvedevin Bakı səfəri iki ölkə arasında münasibətləri daha da möhkəmləndirəcək. “Hazırda çox geniş gündəlik mövcuddur. Bizim münasibətlərimiz dinamik inkişaf edir”. 

"Rusiya bu istiqamətdə səylərini davam etdirir"

Prezident qeyd edib ki, uzun müddətdir, Azərbaycanın Dağlıq Qarabağ bölgəsi, o cümlədən ətrafdakı 7 rayon işğal altındadır, 1 milyondan çox məcburi köçkün və qaçqın var: “Münaqişənin tənzimlənməsi ilə bağlı mexanizm və  BMT  Təhlükəsizlik Şurasının 4 qətnaməsi var. Təəssüf ki, bu qətnamələr yerinə yetirilmir. Rusiya BMT  Təhlükəsizlik Şurasının və ATƏT-in Minsk Qrupunun üzvü kimi mühüm ölkədir. Prezident Vladimir Putin problemlə bağlı mənə və Ermənistan prezidentinə zəng edib”.

Dövlət başçısı qeyd edib ki, Azərbaycan atəşkəsə əməl edir, Ermənistanın da atəşkəsə əməl edəcəyinə ümidvardır: “Ermənistanın Azərbaycanı eskalasiyada günahlandırması əsassızdır. Biz sadəcə torpaqlarımızı və mülki şəxslərimizi qoruyuruq. Azərbaycan münaqişənin sülh yolu illə həllində maraqlıdır və danışıqlar prosesini davam etdirəcəyik. Minsk Qrupunun həmsədrlərinin bölgəyə son səfərini dəstəkləyirik. İnanırıq ki, status-kvo dəyişəcək, Azərbaycan torpaqları işğaldan azad ediləcək. Bundan sonra region çiçəklənəcək, bütün region ölkələri inkişaf edəcək”.

D. Medvedev qeyd edib ki, Rusiya Dağlıq Qarabağ münaqişəsinin sülh yolu ilə tənzimlənməsini dəstəkləyir: “Münaqişənin sülh, danışıqlar yolu ilə həllinin alternativi yoxdur və kompromislər yolu ilə həll edilməlidir".

Onun sözlərinə görə, ölkəsi Minsk Qrupunun üzvü kimi bu istiqamətdə səylərini davam etdirir. 

Saat 13:05

Rusiyanın baş naziri Dmitri Medvedev və onun müavini Dmitri Roqozinin Azərbaycana səfəri başlayıb. ANS PRESS-in məlumatına görə, Medvedev artıq prezident İlham Əliyevlə görüş keçirib. İlham Əliyev görüş zamanı Medvedevə Rusiyanın Dağlıq Qarabağ münaqişəsində göstərdiyi mövqeyə görə təşəkkürünü bildirib.

O, Rusiya rəsmisinə cəbhədəki son vəziyyət barədə məlumat verib. Prezident bildirib ki, Ermənistan cəbhə xəttində təxribatlar törədir. Rusiyanın baş naziri Dmitri Medvedev isə münaqişənin sülh yolu ilə həlli üçün ölkəsinin əlindən gələni edəcəyini bildirib.

“Biz Azərbaycanla təkcə münaqişənin həllində deyil, digər sahələrdə - humanitar və iqtisadi sahələrdə də əməkdaşlıq edirik. Dağlıq Qarabağdakı vəziyyət çox çətindir. Biz istəyirik ki, münaqişə Birləşmiş Millətlər Təşkilatının qətnamələrinə uyğun həllini tapsın. Ümid edirik  ki, tərəflər danışıqları masa arxasında davam etdirəcəklər. Mən özüm də çox səy göstərirəm ki, münaqişə həllini tapsın”.

İlham Əliyev və Dmitri Medvedev arasında görüş (2010-cu il)
İlham Əliyev və Dmitri Medvedev arasında görüş (2010-cu il)

Bu gün   məhdud tərkibdə görüş başa çatdıqdan sonra Azərbaycan Respublikasının Prezidenti İlham Əliyevin və Rusiya Federasiyası Hökumətinin Sədri Dmitri Medvedevin nümayəndə heyətlərinin iştirakı ilə geniş tərkibdə görüşü olub. 

Ötən gün isə Dmitri Medvedev İrəvana səfər edib. O, Ermənistanda prezident Serj Sarkisyan və baş nazir Ovik Abramyanla görüşüb.

Onun bu aralar Ermənistana və Azərbaycana səfər etməsi aprelin 2-dən 5-nə qədər  təmas xəttində baş verən gərgin vəziyyətlə bağlıdır.

O, səfəri çərçivəsində “erməni soyqırımı” abidəsini ziyarət edib.

Bundan əvvəl Medvedevin Avrasiya İqtisadi Birliyinin (AİB) baş nazirlərinin iclasında iştirak edəcəyi bildirilirdi. Amma Ermənistan-Azərbaycan təmas xəttində baş verən son gərginlikdən sonra təşkilata sədrlik edən Qazaxıstanın təklifi ilə həmin toplantı təxirə salınıb.