Avstraliyalı alim Martin Carvis iddia edir ki, İohann Sebastyan Baxın adına çıxılan bəzi əsərlər əslində onun ikinci arvadı Anna Maqdalena Vilka tərəfindən yazılıb. Söhbət tanınmış bəstəkarın violonçel üçün süitalarından gedir. «Reuters» agentliyinin məlumatına görə, Darvin şəhər orkestrinin dirijoru olan alim, bu araşdırmaya 30 il sərf edib.
Alimin iddiasına görə, bu süitaların Baxa məxsus olmaması ilə bağlı 18 sübut mövcuddur. Martin Carvisin fikrincə, onlardan ən tutarlısı Baxın süitalarının 1713-cü ildə Anna Maqdalenanın xəttilə yazılmış iki partiturası (çoxsəsli musiqi əsərinin bütün əsas partiyalarının məcmusu) sayılmalıdır. Alim, Anna Maqdalena Vilkanın İohann Sebastyan Baxla tanışlığından yeddi il əvvəl onları kağıza necə köçürdüyü barədə çox düşünüb. Lakin partituralardan birinin nüsxəsini diqqətlə öyrəndikdən sonra müəyyənləşdirib ki, onun üz qabığında Ecrite par Madam Bachen sözləri yazılıb. Bu, «Xanım Bax tərəfindən yazılıb» deməkdmir.
Qeyd edək ki, Bax, Anna Maqdalena ilə 1721-ci ildə evlənib. Bəstəkar, 1750-ci ildə dünyasını dəyişib. /ANS PRESS/

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.