Artıq üzümüzə gələn tədris ilindən orta məktəblərdə ibtidai siniflər milli kurrikulum proqramı üzrə təhsil alacaq. Kurrikulum qədim latın dilində «Araba yolu» deməkdir. Dünya təhsil sisteminə inteqrasiya məqsədilə tətbiq olunan bu tədris proqramı müəllimlər və şagirdlər qarşısında yeni tələblər irəli sürür. Məsələn, kurrikulum sistemi şagirdi müxtəlif nəzəri biliklərlə yükləməyi deyil, ona əldə etdiyini həyatda tətbiq etməyi öyrənməyi aşılayır. Bu sistemlə oxuyacaq şagirdlər müstəqil və məntiqi düşünməyi, münasibət bildirməyi, ünsiyyət qurmağı, əməkdaşlıq etməyi bacarmalıdır:

Azad Müəllimlər Birliyinin sədri Məlahət Mürşüdlünün sözlərinə görə, proqramın ən müsbət cəhətlərindən biri odur ki, müəllimə tam müstəqillik verəcək: «Şagird ən vacib nəyi bilməlidir, nə etməyi bacarmalıdır, öyrəndiklərini həyata necə tətbiq etməyi bilməlidir, necə insan olmalıdır. bilmək, etmək, olmaq, bax, bu üç formulu ehtiva edən proqramdı».

Yeni proqrama görə, şagird yaşına uyğun müxtəlif ədəbiyyatlardan, lüğətdən, məlumat xarakterli kitabçalardan faydalanmalıdır. Vəzifələrini yerinə yetirməklə yanaşı, o, özünün və başqalarının hüquqlarına hörmətlə yanaşmalıdır. Qeyd olunan tələblər yerinə yetirilmədiyi halda, onlar növbəti pilləyə buraxılmayacaq.

Kurrikulumun tələbləri sırasına yeni müəllim-şagird münasibətlərinin qurulması, informasiya-kommunikasiya texnologiyalarından istifadə də daxildir. Kurrikulum proqramının əsas yükünü isə müəllimlər daşıyacaq. Məlahət Mürşüdlü bu proqramla müəllimləri çox çətin sınaqlar gözlədiyini bildirir: «Müəllimlər daim öz üzərlərində işləməlidir, yeni metod və texnologiyaları öyrənməlidir. Çətin olacaq. Mənə elə gəlir çox müəllimlər yorulub yolda qalacaq. O tələblər baxımından işləmək lazım gələcək. Kim tələblərə riayət etməyəcək, müxtəlif üsul və formaları işləməyəcək onlar üçün zor olacaq».

Azad Müəllimlər Birliyinin sədri yeni proqramın tətbiqi, işlənməsi və müzakirəsi ilə bağlı ictimai təşkilat və birliklərin, qeyri-hökumət təşkilatlarının, eləcə də təhsil nazirliyinin birgə əməkdaşlığının vacibliyini də vurğulayır. Onun sözlərinə görə, mütəmadi monitorinqlər keçirmək, tövsiyyələr hazırlamaqla, yeni proqramın tətbiqinin nəticələri dəyərləndirilməlidir. /ANS TV/

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.