Bu gün orta ümumtəhsil məktəblərinin 11-ci sinif şagirdləri sonuncu mərkəzləşdirilmiş test imtahanı verəcəklər. Bakı şəhər Təhsil İdarəsindən verilən məlumata görə, bu məqsədlə paytaxtdakı 126 məktəbdən 84-də imtahan mərkəzi yaradılıb. Şagirdlər 8 fənndən 125 suala cavab verəcəklər. 3 minə yaxın müəllim isə onlara nəzarət edəcək. İmtahanda 27 mindən çox şagird iştirak edəcək. İl ərzində qeyri-kafi qiymət alan 800-ə yaxın şagird imtahanlardan kənarda qalacaq. Ötən il imtahandan kəsilən 900-ə yaxın şagird isə, kəsildiyi fənndən təkrar imtahan vermək imkanı qazanacaq.
Daxili İşlər Nazirliyindən verilən məlumata görə, ölkə polisi imtahan mərkəzlərinin ətrafında təhlükəsizlik tədbirləri görəcək.
Qeyd edək ki, bu il Azərbaycanın orta məktəblərini 52 minə yaxın şagird bitirəcək. Mərkəzləşdirilmiş test imtahanı Azərbaycanda ötən ildən tətbiq olunur./ANS TV/

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.