Rusiyanın Elista şəhərində davam edən şahmat üzrə FİDE qran prisində 7-ci turun oyunları keçirilib. Yarışda iştirak edən 3 şahmatçımızdan heç biri bu turda qələbə qazana bilməsə də, turnir cədvəlinə həmyerlimiz başçılıq edir. Bu, Bakı Qran-Prisinin qalibi Vüqar Həşimovdur. Şahmatçımız fransız Etyen Bakro ilə sülh bağlasa da, bu heç-heçə Vüqarı lider edib. Digər həmyerlimiz Şəhriyar Məmmədoyarov isə heç-heçə sindromundan qurtula bilmir. İlk 6 oyunun hamısında sülh bağlamış qrossmeysterimiz, bu tur rusiya təmsilçisi Dmitri Yakovenko ilə xalları yarı bölüb. Təəssüf ki, 7-ci tur şahmatımızın bir nömrəsi Teymur Rəcəbov üçün uğursuz olub. Ernesto İnarkiyevə qarşı qara fiqurlarla oynamış Teymur, 62-ci gedişdə təslim olaraq, qran-pridəki ilk məğlubiyyətini alıb. 7 turdan sonra 4 xal yarım toplamış Vüqar Həşimov və Aleksandr Qrişuk, 1-2-ci yerləri bölüşdürür. Teymurla Yakovenko yarım xallıq geriləmə ilə sonrakı pillələrdə qərarlaşıb. Aktivində 3,5 xal olan Şəhriyar Məmmədyarov isə 5-cidir. Növbəti 8-ci turun görüşləri bu gün keçiriləcək. Bu gün 2 şahmatçımız Teymur Rəcəbovla Vüqar Həşimov qarşılaşacaq. Digər şahmatçımız Şəhriyarın rəqibi isə Ernesto İnarkiyev olacaq. /ANS TV/

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.