Futbol üzrə Türkiyə Super Liqasında 2008-ci ilin son derbisi bu gün əzəli rəqiblər “Qalatasaray” və “Beşiktaş” arasında keçiriləcək. Çempionatən 15 turundan sonra aktivində 30 xalı olan “Qalatasaray” turnir cədvəlində 4-cü, 28 xalı olan “Beşiktaş” isə 6-cı pllədə qərarlaşıb.
Meydan sahibi “Qalatasaray”, bu mövsüm Əli Sami Yen stadionunda keçirdiyi 7 matçın 6-də qalib gəlib, 1 matç isə heç-heçə oynayıb. Cimbom bu matçda da qalib gələrək uğurlu seriyanı davam etdirmək arzusundadıh.
Bu mövsüm səfərdə keçirdiyi 7 matçın yalnız 2-də qələbə qazanan “Beşiktaş” isə səfərdə keçirəcəyi bu derbi matçda qalib gələrək, liderlərdən uzaqlaşmamaq istəyir.

-QALATASARAY CƏBHƏSİ-

”Qalatasaray”ın heyətində zədəsi davam edən Kyuell, Əmrə Güngör, Həsən Şaş, Sərxan Çalıq, Uğur, Alparslan və Orkun derbi matçta çıxış etməyəcək.
Sarı-qırmızılı klubda aktivində 3 sarı vərəqəsi olan Meira, derbidə də sarı vərəqə alacağı təqdirdə cəzalı vəziyyətə düşəcək.

-BEŞİKTAŞ CƏBHƏSİ-

”Beşiktaş”da isə cəzalı Sivok və İbrahim Üzülməzlə yanaşı, zədəli olan Sərdar Qurtuluş və Aydın derbi matçda oynamayacaq.
Ağ – qaralarda mövsümün əvvəlindən bu yana 3 sarı vərəqəsi olan Rüştü, Sisse, İbrahim Toraman, Nobre və Sərdar Özkan, derbidə də sarı vərəqə alacaqları halda cəzalı vəiyyətə düşəcəklər.

Əzəli rəqiblərin derbi matça bu heyətlərə çıxacağı gözlənilir:

Qalatasaray: De Sanctis, Səbri, Sərvət, Meira, Hakan, Barış, Ayhan, Mehmet Topal, Arda, Linkoln, Baroş

Beşiktaş: Rüştü, Əli Tandoğan, Zapotoçni, Gökhan, Əkrəm, Holosko, Sisse, İbrahim Toraman, Tello, Delqado, Nobre
Qeyd edək ki, İstanbul Əli Sami Yen stadionunda keçiriləcək matç Bakı vaxtı ilə saat 21:00-da başlanacaq və Lig TV vasitəsilə canlı yayınlanacaq.

Elvin Rəsul/ANS PRESS/

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.