"“Azəriqaz" Səhmdar Cəmiyyəti əhaliyə verilən qazın həcmini şişirdir”. İstehlakçıların hüquqlarının qorunması koalisiyasının həmsədri Mehman Əliyev bu nəticəyə apardıqları monitoinqlər nəticəsində gəldiklərini deyir. Onun sözlərinə görə, bu ilin 10 ayında təkcə Bakıda əhali abunəçilərinə illik tələbatdan təqribən 50 faiz çox mavi yanacaq verilib.
Mehman Əliyevin fikrincə, qazın 1000 kub metrinin 7 dəfədən çox bahalaşaraq 47 manata satılması da bu qənaətə gətirib çıxarmalı idi. Bunu və Azəriqaz rəsmilərinin sayğaclaşmadan sonra sərfiyyatın azaldığı barədə dediklərini əsas gətirən Mehman Əliyev texniki itkilərin artdığını da diqqətə çatdırdı: “Rəsmi statistikaya görə, bu ilin 11 ayında sistemdə itkilər 450 milyon kub metri keçib. Bizim qənaətimizə görə kommersiya obyektlərinə və istixanalara satılan qazın bir qismi texniki itkilər adı altında silinir və ya əhalinin ayağına yazılır”.
Koalisiya "Azəriqaz"ı abunəçilərlə yeni müqavilə bağlamağa da çağırır: “Müqavilələr çox adamla bağlanmır. Bağlanan müqavilələr də bir tərəflidir. Əhalinin maraqlarını əks elətdirmir. Qazın təzyiqi necə olacaq, nə qədər olacaq. Verilməyəndə paylayıcı hansı məsuliyyət daşıyır. Abunəçinin hüququ nədir”.
Amma "Azəriqaz"da bununla razılaşmırlar. Səhmdar Cəmiyyətin şöbə müdiri Tofiq Allahverdiyevin sözlərinə görə, adambaşına 30 kub metr qaz yalnız 4 göz plitəyə görə hesablanır. İtkilərin həcminin artımına gəlincə, "Azəriqaz" rəsmisi həcmin ildən-ilə artdığı ilə razılaşsa da, onun xüsusi çəkisinin azaldığını bildirdi: “2008-ci ildə nəql sisteminə daxil olan mavi yanacağın həcmi 3 dəfə artıb, deməli texniki itklər də artmalıdır. Amma müqayisə aparsaq görərik ki, əvvəllər itki 15 faiz təşkil edirdisə, indi cəmi 6 faizdir”. Tofiq Allahverdiyev istixanalara verilən qazın bir hissəsinin itkilərdə göstərilməsiylə ümumiyyətlə razılaşmır. Onun sözlərinə görə, bu gün kommersiya obyektləri və istixanalara nəzarət əhali qrupundan da sərtdir. “Monitorinq keçirilirsə, bizə bildirməliyidi və bizimkilər də orda iştirak etməli idi. Əgər qaz təsərrüfatında monitorinq keçirilirsə, KİV əməkdaşları da aparılsın. O zaman biz də onu qəbul edərdik”.
Əhali ilə bağlanan müqavilənin mətninin dövlət antiinhisar xidmətiylə razılaşdırıldığını deyən Azəriqazın şöbə müdiri istehlakçı hüquqlarının qorunması fikrini qəbul etmir. /ANS TV/

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.