Türkiyədə bir qrup ziyalının qondarma erməni soyqırımının qəbul edilməsi məqsədilə internetdə təşkil etdiyi “ermənilərdən üzr istəyirik” imza kampaniyasına cavab olaraq "özür bekliyorum" (üzr istənilməsini gözləyirik) kampaniyası başlayıb. Bu barədə Türkiyədə təhsil alan azərbaycanlı tələbə Rza Məmmədov ANSPRESS-ə məlumat verib.

Kampaniya www.ozurbekliyorum.com internet saytı vasitəsilə aparılır. Saytda isə belə bir mətn yerləşdirilib: "Keçmişdə və indi çox zalım tərəfindən zülmə məruz qalan Türklər adına, bu zülmləri edənlərin və bu zülmlərə göz yumanların üzr istəməsinin vacib olduğunu düşünürəm. Bu vəhşiliklərə göz yummayacağımı bəyan edir, bütün Türk Dünyası adına, gənc bir Türk olaraq üzr gözləyirəm!".

Saytın ana səhifəsində Mustafa Kamal Atatürkün şəxsi arxivindən ermənilərlə bağlı sitata da yer verilib; “Minlərlə çarəsiz və günahsız ana və uşaqları işgəncəylə öldürmüşdülər. Tarixdə bənzəri görünməmiş olan bu vəhşiliyi edən ermənilər idi”, səh.260-261, Nutuk.

Saytda Xocalı soyqırımından şəkillər, həmçinin Türkiyədə erməni terroru nəticəsində şəhid olmuş türk diplomatlarının adları, işlədikləri yerlər yerləşdirilib.

Xocalı soyqırımı: 1992-ci il fevralın 25-dən 26-na keçən gecə Ermənistan silahlı dəstələri Xankəndidə yerləşdirilmiş Rusiyaya aid 366-cı motoatıcı alayının zirehli texnikası və hərbi heyətinin dəstəyi ilə azərbaycanlılar yaşayan Xocalı şəhərinə hücum edib. Hücumdan əvvəl, fevralın 25-i axşam çağından şəhər toplardan və ağırzirehli texnikadan şiddətli atəşə tutulmağa başlayıb. Nəticədə, şəhərdə yanğınlar baş verib və fevralın 26-sı səhər saat 5 radələrində şəhər tam alova bürünüb. Belə bir vəziyyətdə, erməni əhatəsində olan şəhərdə qalan, təqribən, 2500 nəfər əhali yaxınlıqda, azərbaycanlılar məskunlaşan Ağdam rayonunun mərkəzinə çatmaq ümidi ilə şəhəri tərk etməyə məcbur olublar. Ancaq bu niyyət baş tutmayıb. Xocalıda XX əsrin ən böyük faciələrindən biri baş verib. Əsas tərkibi milliyyətcə erməni olan həmin alay yerli əhalini amansızcasına qətlə yetirib, qadınları və az yaşlı uşaqları öldürüb. Bu faktlar mərhum telerepartyor Çingiz Mustafayevin çəkdiyi lentlərlə, sənəd və fotoşəkillərlə bir daha sübut olunub. Xocalı soyqırımı nəticəsində 613 nəfər həlak olub: uşaqlar - 63 nəfər; 8 ailə tamamilə məhv edilib; 25 uşaq hər iki valideynini itirib; 130 uşaq valideynlərindən birini itirib; 487 nəfər yaralanıb, 1275 nəfər əsir götürülüb, 150 nəfər itkin düşüb.

Qeyd edək ki, Türkiyədə bir qrup ziyalı internet vasitəsilə “ermənilərdən üzr istəyirik” kampaniyası başladaraq, bütün Türkiyə xalqını bu kampaniyaya qoşulmağa çağırıb. /ANS PRESS/

© 2008-2009 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.