Yol kənarında taksilərin dayanmasının və tıxacların yaranmasının qaşısını almaq məqsədilə Bakıda 32 taksi dayanacağı istifadəyə verilib. Nəqliyyat Nazirliyi gələcəkdə belə taksi dayanacaqlarının sayını artırmaq niyyətindədir.

Bakı Şəhər İcra Hakimiyyəti ilə birlikdə hazırlanan, Dövlət Yol Polisi və Nəqliyyat Nazirliyi tərəfindən təsdiqlənən sxemlərə əsasən, artıq 32 taksi dayanacağı istifadəyə verilib. Azneft meydanı, dəmiryolu vağzalı və İçərişəhərdə artıq belə dayanacaqlar sürücülərin tam istifadəsindədir. Dayanacaqlar tam hazır olana qədər paytaxtdakı taksilər də yeniləri ilə əvəzlənəcək.

Artıq bu məqsədlə Yaponiya istesalı olan 80-ə qədər maşın gətirilərək istifadəyə verilib. Məqsəd tıxacların qarşısını almaq və  yol kənarlarından taksilərin yığışdırılmasıdır. Sürücülərinin sözlərinə görə, məhz belə dayanacaqların indiyə qədər olmaması yol hərəkəti qaydalarında intizamsızlıq yaradır.

Nəqliyyat Nazirliyindən ANS TV-yə verilən məlumata görə, bu il paytaxtdakı taksi dayanacaqlarının sayı 134-ə çatdırılacaq. Mərkəzləşdirilmiş taksi dayanacaqları əhalinin rahatlığının təmin etməklə yanaşı, sürücülərin işini də asanlaşdıracaq. Sərnişinlərin komfortlu daşınmasını təmin etmək məqsədi ilə ən son model və daha rahat avtomobillərdən taksi dayanacaqlarında istifadə olunması nəzərdə tutulub. Belə ki, özəl taksi parkları olan sahiblər də, eləcə də şəxsi taksiləri olan sürücülər də bu dayanacaqlardan istifadə etmək üçün Bakı Sərnişin Nəqliyyatı Məhdud Məsuliyyətli cəmiyyətə müraciət etməlidirlər. Avtomobillərə isə bütün standartlara cavab verdiyi halda onlara bu dayanacaqlarada dayanmaq icazəsi verilə bilər.

Nazirlikdə onu da deyirlər ki, paytaxtda fəaliyyət göstərən taksilərdə həm də ilk dəfə olaraq sərnişin oturacaqları əvvəlcədən sığortalanacaq və taksilərdə hadisə baş verdiyi zaman sərnişinlərə dəyən zərəri sığorta şirkətləri ödəyəcək. /ANS TV/

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.