Türkiyənin Baş naziri Rəcəp Tayyip Ərdoğan Suriyanın paytaxtı Şamdan qayıdarkən onu müşayiət edən jurnalistlərə açıqlama verib. R.T.Ərdoğan prezident Abdullah Gülün İrəvana səfər etməsini dəstəklədiyini bildirib. A.Gülün səfərinə qarşı çıxanlara etirazını bildirən R.T.Ərdoğan, hər şeyden öncə Ermənistan prezidentinin A.Gülü matça dəvət etdiyini xatırladıb. Ardınca, tarixi addımın strateji analizini verib: "Abdullah bəyin verəcəyi cavab Türkiyənin beynəlxalq aləmdəki nüfuzuna təsir edəcəkdi. Getməyəcəyi təqdirdə “Bir idman yarışına belə getmir” deyiləcəkdi. Ermənistanın planı var idisə, A.Gülün İrəvana getməsi bu planı pozdu."

 R.T.Ərdoğan, Cümhuriyyət Xalq Partiyası (CHP) lideri Dəniz Baykalın "A.Gül getmişkən qondarma soyqırım abidəsinə də çələng qoysun" sözlərinə isə sərt reaksiya göstərib: "Hara çələng qoyacağını cənab prezident, Baykaldan öyrənəcək deyil. Mənim ölkəmin prezidenti üçün bu münasibəti xoş qarşılamıram. Çox iyrəncdir." 

Ərdoğanın "Ermənistana prezidentin əvəzinə Baş nazirin getməsi daha düzgün olardı" fikirlərinə isə münasibəti belə olub: "Bu formada dəyərləndirmə çox yanlış olar. Hər şeydən öncə bu səfər siyasətlə əlaqədar deyil. Sadəcə olaraq Ermənistan prezidenti, Türkiyə prezidentini bir matça dəvət edib".

Ə rdoğan bu günkü matçdan qələbə qələbə gözlədiyini də bildirib: "Normal şərtlərdə qələbə gözləyirəm. Avropa Çempionatında qazandığımız nüfuzumuzu itirməməliyik"./ANS PRESS/

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.