Bu gün Milli Qəhrəman Çingiz Mustafayevin ad günü ilə əlaqədar ANS ÇM radiosunun elan etdiyi vətənpərvər mahnı müsabiqəsinin nəticələri açıqlanıb. Qaliblərə diplom, eləcə də pul mükafatları təqdim olunub . Müsabiqənin nəticələrinə görə birinci yer İbrahim İbrahimovun “Milli düşüncə və gənclər”, 2-ci yer Faiq Kazımovun “Vətənpərvər ballada”, 3-cü yer isə Namiq Zeynalovun “Yaşa Azərbaycan mahnılarına verilib”.  1-ci yerin sahibinə 500, 2-ci yerə 300, 3-cü yerin qalibinə isə 200 manat pul mükafatı təqdim edilib.
Qeyd edək ki, müsabiqənin qalibləri 52 iştirakçı arasından seçilib. ANS ÇM radiostansiyasının departament rəhbəri Aytən Zeynalovanın sözlərinə görə, müsabiqənin keçirildiyi 4 il ərzində 476 mahnı təqdim olunub və 15 qalib müəyən edilib.  Bu il təqdim olunan mahnıların çoxu rok janrında olub.
Xatırladaq ki, vətənpərvər mahnı müsabiqəsi artıq 4-cü ildir ki, keçirilir. Müsabiqənin əsas şərti isə təqdim olunan mahnıların yeni olması, heç bir televiziya və radiostansiyada səsləndirilməməsidir. İstənilən musiqi janrında olan mahnılar avqustun 25-dək ANS ÇM radiosuna təqdim olunmalı idi. Heç bir məhdudiyyət qoyulmayan müsabiqədə qalib gələn mahnılar ANS ÇM dalğasında yayım imkanı da qazanır./ANS TV/

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.