Gürcüstanda baş verən hadisələrdən sonra fəaliyyəti iflic vəziyyətinə düşən Bakı beynəlxalq dəniz limanında işi hələ bərpa etmək mümkün olmayıb. Dəniz limanından ANS-ə verilən məlumata görə, liman əvvəllər gündə Gürcüstan limanlarından gələn 100 vaqon yükü tankerlərlə Mərkəzi Asiya ölkələrinə - Qazaxıstana və Türkmənistana yola salırdısa, indi 1 dənə də olsun vaqon göndərilməyib. Eləcə də Qazaxıstandan və Türkmənistandan gələn yüklərin sayı kəskin şəkildə aşağı düşüb. Azərbaycan dövlət dəmir yol idarəsinin daşıma proseslərini idarəetmə birliyinin rəisi İsfəndiyar Kərimov isə bildirir ki, Gürcüstan limanlarına və əks istiqamətə yüklərin daşınmasını artırmaq üçün bu ölkənin dəmir yol idarəsi ilə danışıqlar aparılır.
Bu gün Gürcüstan limanlarına 22 qatar yola salınıb. Dünən isə bu rəqəm 19 idi. Gürcüstandan isə 9 qatar qəbul olunub. Bu göstərici isə dünənə nisbətən 3 qatar azalıb. Dövlət dəmir yol idarəsində deyirlər ki, indi əsas çətinlik Gürcüstanda qalan boş vaqonların gətirilməsindəki ləngimədir. Hazırda Poti, Batumi və Kulevi limanlarında Azərbaycan üçün nəzərdə tutulmuş 480 boş vaqon qalıb. Gürcüstan tərəfi isə dəmiryolu ilə yükdaşımada bu ölkənin qara dəniz limanlarında vəziyyətin normallaşdığını bildirir.
“Gürcüstan dəmir yolunda körpü partladılandan və qatarda yanğın olandan sonra bizim işimizdə müəyyən çatışmazlıqlar yarandı. İndi vəziyyət yaxşılaşır, 18-20 qatar Azərbaycandan gündəlik olaraq alırıq. Bu ölkədən qatarların qəbulunda problem yoxdur. Azərbaycandan gələn neft və neft məhsulları əsasən tankerlərlə Avropaya, xüsusən İtaliyaya ixrac olunur. Kulevi terminalı bu gecə 3 qatar alıb. Bu gün də ardı gələcək” – deyə Kulevi dəmir yol stansiyasının rəisi Robert Kaçaraua bildirib.
“Azərbaycana əsasən şəkər, sement və klinker dolu vaqonlar yola salırıq. Bu sarıdan problem yoxdur. Yüklər boşaldılan kimi çalışırıq yola salaq. Vaqonların boşaldılmasındaki problemlər də artıq həll olunur. Azərbaycanın böyük kəsik stansiyasından mütəmadi olaraq yüklə dolu qatarlar gəlir və biz onları qəbul edirik” – deyə Poti dəmir yol stansiyasının rəisi Otaki Potaşia deyib.
Qeyd edək ki, avqustun 16-da Kaspı yaxınlığında partladılan körpüdə təmir işləri sürətləndirilib. Yaxın günlərdə bu körpünin üzərindən keçən iki yoldan birinin bərpası başa çatmalıdır. Bundan sonra körpü üzərindən hərəkət qismən də olsa da, bərpa olunacaq. Ümumilikdə təmir işlərinin tam olaraq sentyabrın ortalarında yekunlaşacağı gözlənilir. Bundan başqa alternativ körpüdən keçən yola əlavə yolayrıcları qoşulmaqla buradan daşınan yüklərin həcmi artırılacaq. /ANS TV/

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.