«Şanxay Əməkdaşlıq Təşkilatı ölkələrinin Abxaziya və Cənubi Osetiyada Rusiyanın sülhməramlı missiyası üzrə vahid mövqeyi beynəlxalq rezonans doğurmalı və Gürcüstanın hərəkətinə haqq qazandıranlar üçün ciddi siqnal olmalıdır». Bunu qurumun Düşənbədə keçirilən iclasında çıxış edən Rusiya Federasiyasının prezidenti Dmitri Medvedev bildirib.

«Təəssüf ki, güc tətbiq edilməklə milli maraqların təmin edilməsi istiqamətində cəhdlərin davam etdiyini qeyd etməli oluruq. Gürcüstanın Cənubi Osetiyaya qarşı təcavüzü belə məsuliyyətsiz və cinayətkar əməllərə misaldır», - deyə Rusiya prezidenti bildirib.

Qeyd edək ki, Tacikistanın paytaxtı Düşənbədə Şanxay Əməkdaşlıq Təşkilatının dövlət rəhbərlərinin sammitində üzv dövlətlər- Rusiya, Tacikistan, Çin, Özbəkistan, Qazaxıstan, Qırğızıstan rəhbərləri, həmçinin müşahidəçi dövlətlər - Monqolustan, Pakistan, İran, Hindistan prezidentləri və qonaq qismində Əfqanıstan prezidenti iştirak edir. İştirakçılar Tacikistan prezidenti İmomali Rahmonun sədrliyi altında terrorçuluqla mübarizə məsələsini müzakirə ediblər. Gündəliyə Mərkəzi Asiyada təhlükəsizlik problemləri də daxil edilib.

Rusiya kütləvi informasiya vasitələrinin yaydığı məlumata görə, sammitdə hər hansı bir qərarın qəbul edilməsi Çin tərəfinin mövqeyindən asılı olacaq. Belə ki, separatçılıq meylərindən əziyyət çəkən rəsmi Pekinin Rusiyanın qondarma Cənubi Osetiya və Abxaziyanın müstəqilliyini tanınması qərarını necə qarşılayacağı məlum deyil. Məsələ ilə bağlı ilk mövqeyini açıqlayan rəsmi Pekin bildirib ki, tərəflər yaranmış vəziyyətdə diplomatik yolla həll variantlarını tapmalıdırlar. /ANS TV/

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.