Ukraynanın  Xarkov vilayətində silah anbarında baş verən yanğın səbəbilə ətraf ərazilərdə yaşayan 18 min nəfər evakuasiya olunub. Vilayətin vitse-qubernatoru Sergey Storojenko vətəndaşların müvəqqəti olaraq daha təhlükəsiz ərazilərdə yerləşən binalara köçürüldüyünü bildirib. Hazırda yanan anbarda partlayışlar davam edir. Alov nəticəsində partlayan mərmilərin qəlpələrinin beş kilometr diametrdə yayıla biləcəyi ehtimal olunur. Hələlik hadisə nəticəsində iki nəfərin yüngül yaralandığı bildirilir. Ukrayna Fövqəladə Hallar Nazirliyi yanğının yaxınlıqdakı meşədə quru otun alışmasından qaynaqlandığını açıqlayıb.

Silah anbarında yanğının söndürülməsinə 1500 nəfər və 168 texnika cəlb olunub. Vilayətin vitse-qubernatoru Sergey Storojenko yanğın və partlayışların hələ 2-3 gün davam edəcəyini istisna etməyib. Bununla belə, Ukrayna Daxili İşlər Nazirliyi hazırda hadisənin baş verməsinin 6 ehtimalı üzərində təhqiqat aparlıdığını açıqlayıb. /ANS TV/

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.