Almaniyanın kansleri Angela Merkel Qana prezidenti Con Kuforla ölkə paytaxtı Berlində jurnalistlər qarşısında birgə mətbuat konfransı keçiriblər. Mətbuat konfransında Almaniya Federativ Respublikasının hökumət başçısı Rusiya ilə Gürcüstan arasında baş verən hadisələrə və Rusiya Federasiyasının prezidenti Dmitri Medvedevin qərarına öz münasibətini bildirib. Xanım Merkel Avropa Birliyinin vasitəçiliyi ilə Gürcüstanda əldə olunmuş atəşkəsə uzunmüddət əməl olunmasını vacib sayıb. Xanım Merkel  Gürcüstandakı qondarma rejimlərin rəsmi Moskva tərəfindən tanınması ilə bağlı Rusiyanı tənqid edib.

Hökumət başçısının bəyanatında bildirilir ki, Almaniya kansleri Angela Merkel Rusiya prezidenti Dmitri  Medvedevlə telefon danışıqları aparmış və Avropa Birliyinin dərhal  tələbini yerinə yetirməyi çatdırıb. “Mən bu gün yenə də Rusiya prezidenti ilə söhbət apardım. Çünki, mən belə fikirləşirəm ki, birbaşa fikir mübadiləsi və dialoq aparmaq əhəmiyyətlidir. Təkrar olaraq bildirmişəm ki, 6 mərhələli sülh planı yerinə yetirilməyib. Xüsusilə də Rusiya qoşunlarının Potidə və başqa nəzarət etdiyi məntəqələrədə. Eyni zamanda mən həmçinin Abxaziya və Osetiyanın tanınması ilə bağlı nə üçün tənqid etdiyimizi də bildirdim. Mən onu da aydınlaşdırdım ki, birtərəfli tanınmamışdan əvvəl, məsələnin ATƏT və BMT Təhlükəsizlik Şurasında məsələnin müzakirə olunacağını gözləyirdim. Birləşmiş Millətlər Təşkilatının Təhlükəsizlik Şurasının Gürcüstanın ərazi bütövlüyü ilə bağlı bir çox qətnamələri var”.   
 
Qeyd edək ki, Almaniya hökuməti  Avropa Təhlükəsizlik və Əməkdaşlıq Təşkilatının Gürcüstana göndərdiyi 200 nəfərlik şəxsi heyətin tərkibində 15 nəfər monitorinq qrupu üzvü göndərməyə razılıq verib. Mətbut konfransında Almaniyanın  hökumət başçısı Angela Merkel bildirib ki, monitorinq  qrupunun almaniyalı təmsilçilərindən 2-si artıq oradadır və onlar dərhal işə başlayacaqlar. Almaniya kanslerinin oktyabr ayında Rusiya Federasiyasına gedəcəyi və Strasburqda Rusiya prezidenti Dmitri Medvedevlə görüşəcəyi gözlənilir./ANS TV/

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.