«ATƏT nümayəndələrinin Ağdam rayonu ərazisində bu il mayın 7-də keçirilən sonuncu monitorinqindən sonra ermənilərin açdığı atəş nəticəsində üç dinc sakin yaralanıb». Bu barədə Ağdam rayon İcra Hakimiyyətinin başçısı Həsən Sarıyev məlumat verib.

O bildirib ki, ermənilər bu müddət ərzində işğal altındakı 340 hektar ərazini tamamilə yandırıblar. Nəticədə rayona 426 min manat ziyan dəyib. H.Sarıyev həmçinin qeyd edib ki, ermənilər işğal altındakı ərazilərdə tez-tez hərbi təlimlər keçiriblər: «Ermənilər nümayişkaranə şəkildə ağır artilleriyadan atəş açmaqla əhali arasında təşviş yaratmaq istəyir»,- deyə icra başçısı vurğulayıb.

Qeyd edək ki, Ağdam rayonunun icra başçısı bu məsələləri bu gün rayonda növbəti monitorinq aparan ATƏT nümayəndələrinin diqqətinə çatdırıb. /ANS PRESS/

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.