Dağıdılmış Kaspi-Qrakali körpüsünün bərpası üzrə intensiv işlər aparılır və yükdaşımalarını avqustun 27-dən sonra bərpa etmək mümkün olacaq. Bu barədə məlumatı Gürcüstanın dəmir yol idarəsi yayıb. Körpü işini bərpa etdikdən sonra Gürcüstanın mərkəzindən Qərbinə, eləcə də Azərbaycan və ermənistandan qonşu ölkənin Qara dənizdəki limanlarına yük daşımalarını bərpa etmək mümkün olacaq. Poti limanının marketinq və sərmayələr departamentinin rəhbəri Zviad Çxartişvili isə ANS-ə bildirdi ki, Kaspi-Qrakali körpüsü tezliklə bərpa olunmasa Poti limanı işini tamamilə dayandıracaq. Onun sözlərinə görə limandaki 200 min ton yük tutumu olan anbar demək olar ki, tamamilə dolub. Bu isə quru yüklə gələn gəmilərin boşaldılmasında problemlərin yaranması ilə nəticələnə bilər.

“Liman hələlik adi qaydada işləyir. Dəmiyrolunun bizə verdiyi bütün imkanlardan istifadə edirik. Kaspidə dəmiryolu körpüsü partladığı üçün biz yükləri nə göndərə bilirik, nə də ala. Gəmiləri boşaldib, terminallarda saxlayırıq. Dəmiyrolu bərpa ediləndən sonra bu yükləri yola salacağıq. Biz limanlarda yerləşdirilən yükləri boşaldırıq. Hələki anbarlarda 2 həftəlik yer var. Terminalda olan yüklər və boşaldılmaq üçün nəzərdə tutulan bütün yüklər boşaldılacaq”.

Qeyd edək ki, avqustun 16-da Kaspi rayonunda strateji əhəmiyyətli dəmir yol körpüsü partladıldıqdan sonra Gürcüstandan ermənistana yanacaq göndərilməsi tamamilə dayanıb. Bu vəziyyət Ermənistanda yanacaq qıtlığının yaranmasına, qiymətlərin qalxmasına səbəb olub. Ermənistan informasiya agentliklərinin yaydığı məlumata görə, İrəvandaki bəzi yanacaqdoldurma məntəqələri fəaliyyətini dayandırıb, digərilərində yanacaq talonla yalnız müəyyən strukturlarda işləyən maşınlara vurulur. Məhdudiyyətsiz benzin satılan məntəqələrdə isə böyük növbələr yaranıb. Yanacaq doldurma məntəqələrində hər maşına 10 litrdən çox yanacaq verilmir. Eyni zamanda Ermənistanda benzinin 1 litrinin dövlət tərəfindən müəyyənləşdirilmiş satış qiyməti 1 dollar 60 sent olduğu halda, yanacaq 2 dollar 20 sentə satılır. /ANS TV/

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.