"Rusiya NATO ilə münasibətlərinə yenidən baxacaq". Bunu Rusiya xarici işlər nazirinin müavini Aleksandr Qruşko bəyan edib. Onun sözlərinə görə, dəyişikliklər Rusiya və Şimali Atlantika alyansı arasında hərbi əməkdaşlığa da toxunacaq.

Rusiyanın Gürcüstandan ordunu dislokasiya etmək barədə bəyanatından sonra ciddi bir dəyişiklik baş verməyib. Poti limanında hazırda 5 BTR və 100 Rusiya hərbi qulluqçusu yerləşir. Bu səhər hərbi dəniz qüvvələrinə məxsus əraziyə daxil olan rus hərbi birləşmələri buraya zərbələr endirib. Gürcü mənbələrinin yaydığı məlumata görə, onlar buradakı bankomatı partladıblar. Hadisə şahidlərinin sözlərinə görə, bankomatda pulun olub-olmadığını yoxlayandan sonra ruslar buranı dağıdıblar. Ərazidə gürcü polisi nəzarəti ələ alsa da, rus ordusu öz mövqelərindən geri çəkilməyib.

Ötən gün  axşam saatlarında Rusiya hərbi karvanı yenidən Qoriyə qayıdıb, Qoriyə giriş-çıxış hərbçilər tərəfindən nəzarətə götürülüb, şəhərdə 3 nəzarət buraxılış məntəqəsi qurulub, Rusiya hərbçiləri Avropa Şurası Parlament Assambleyası monitorinq komitəsinin Gürcüstan üzrə həmməruzəçiləri Matiaş Erşi və Kastriot İslamini Qori şəhərinə buraxmayıblar.  Həmməruzəçilər Tiflisdən çıxarkən İqoeti qəsəbəsi yaxınlığında Rusiya hərbçiləri tərəfindən saxlanılıblar. Matiaş Erşi jurnalistlərə deyib ki, Qorinin Rusiya əsgərləri tərəfindən mühasirədə saxlanması və oraya Avropa Şurasının nümayəndələrinin buraxılmaması qeyri-normal vəziyyətdir: "bu, Avropa Şurasının tarixində ilk hadisədir ki, quruma üzv olan bir ölkə digər ölkəni işğal edir”. Fransanın Gürcüstandakı səfiri Erik Furnye isə Qori şəhərini tərk edərkən, Rusiya hərbiçiləri tərəfindən saxlanılıb.
 Rusiya telekanallarının  yaydığı məlumata görə, Cənubi Osetiyada fövqəladə vəziyyət rejimi ləğv edilsə də, komendant saatı qalmaqdadır. Mənbəyə görə, rus hərbi birləşmələri Qorini qrafikə uyğun olaraq tərk edir. Bu gün Qoridən Tsxinvaliyə 40 -a yaxın ağır zirehli texnikadan ibarət ilk hərbi kolon yola düşərək Şimali Osetiya sərhədinə hərəkət edib.

Rusiya hərbi birləşmələri tərəfindən girovluqda saxlanılan 21 gürcü polisinin vəziyyəti normaldır. Bu barədə Xobski və Poti yepiskopu Vladiko Qriqol məlumat verib. Yepiskop deyib ki, onların azad ediləcəyi vaxt məlum deyil. O həmçinin deyib ki, rus hərbçilərinin Qoridən çıxmasına baxmayaraq digər gürcü regionlarına yeni texnikalar yerləşdirirlər.
 Ötən gün Tiflisə gələn NATO-nun Cənubi Qafqaz məsələləri üzrə xüsusi nümayəndəsi Robert Simmons NATO-nun Rusiyanın ordunu Gürcüstandan çıxarmaq barədə öhdəliyə əməl etməyəcəyi təqdirdə kəskin addımlar atacağını deyib. 2 günlük səfər çərçivəsində NATO rəsmisi səfərin məqsədinin vəziyyətlə yerindəcə tanış olmaq olduğunu qeyd edib. “NATO Gürcüstanın ərazi bütövlüyünü və suverenliyini dəstəkləyir. Ümid edirəm ki, rus ordusu tezliklə buranı tərk edəcək. NATO üzvü olan bütün ölkələr belə çətin anlarda Gürcüstanın tərəfindədir”, deyə Simmons deyib.

Avropa parlamenti Rusiyanın gürcü-osetin münaqişə zonasından ordusunu çıxarmaq barədə öhdəliyi yerinə yetirməzsə, birlik Rusiya ilə strateji münasibətləri kəsmək niyyətindədir. Bu barədə məlumatı Parlament Assembleyasının beynəlxalq işlər komitəsinin sədri Yaçek Sariuş Volski verib. Onun sözlərinə görə, qurum NATO-dan da kəskin addımlara əl atacaq.

Gürcüstanda baş verən hadisələrlə əlaqədar, bu gün ATƏT-in fəaliyyətdə olan sədri, Finlandiyanın xarici işlər naziri Aleksandr Stubb bu ölkəyə səfər edib. ATƏT sədrini səfərdə qurumun 20 nümayəndədən ibarət müşahidəçi missiyası izləyir. Səfər çərçivəsində,  Aleksandr Stubb Gürcüstan prezidenti Mixail Saakaşvili ilə görüşməyi planlaşdırır. Müşahidəçi missiyanın isə ölkənin şərqinə baş çəkəcəyi gözlənilir.

Bu gün Azərbaycanda səfərdə olan Ruminıya prezidenti Trayan Basesku bu gün həmçinin Gürüstana qısa müddətli səfərə gəlib. O, Gürcü həmkarı ilə görüşündə Rusiya ilə Gürcüstan arasında münasibətləri müzakirə edəcək. Gürcüstan dövlət dəftərxanasından verilən məlumata görə, Rumıniya prezidenti təyyarə ilə Tsxinvalidən olan qaçqınlar üçün humanitar yardım gətirib. Tiflisdən sonra Baseskunun Türkiyəyə səfəri gözlənilir./ANS TV/

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.