Bu gecə Əzizbəyov rayonu Mərdəkan qəsəbəsində Yesenin 8 ünvanında şəhərdən üzü Şüvəlan istiqamətində hərəkət edən “VAZ 2106” markalı avtomobil naməlum səbəbdən yol kənarındakı ağaca dəyib. Nəticədə maşında olan 5 nəfərdən 4-ü aldıqları xəsarətlərdən hadisə yerində dünyasını dəyişib. 1 nəfər isə ağır vəziyyətdə 3 saylı Sabunçu xəstəxanasına aparılıb.

Qəza zamanı dünyasını dəyişənlərin hamısı məhkəmə tibbi ekspertizası və patoloji anatomiya birliyinin Əzizbəyov rayon şöbəsinə aparılıb. 3 saylı şəhər klinik xəstəxanasına aparılan xəstə isə vəziyyəti ağır olduğuna görə, reanimasiya şöbəsinə yerləşdirilib. Şöbənin həkimi Ramin Əliyevin sözlərinə görə, pasient daxil olan kimi üzərində əməliyyat aparılaraq lazımi tibbi yardım göstərilib. O, sol baldır və sağ baldır bud sümüyünün açıq sınığı və travmatik şokla xəstəxanya daxil olub.Şahidlərin bildirdiklərinə görə, sürücü maşını yüksək sürətlə idarə edirmiş. Faktı qeydə alan Əzizbəyov rayon Polis İdarəsinin baş müstəntiqi Rasim Knyazovun ANS TV-yə verdiyi məlumata əsasən, qəzanın baş vermə səbəbləri aparılan istintaq araşdırmalarından sonra məlum olacaq./ANS TV/

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.