SSRİ-nin Xalq Artisti, həmyerlimiz Müslüm Maqomayev ANS Pressə eksklüziv müsahibə verib. O, ən əvvəl özünü normal hiss etdiyini bildirib. «Düzdü, deyə bilmərəm ki, səhhətim dəmirdəndir, amma yazılanlar kimi deyil. Qəzetlər və agentliklər uydurublar ki, guya mənə həkimlər şuntlama və hansısa başqa əməliyyat etmək niyyətindədir. Belə bir şey yoxdur! Mən oxudum, həkimimə də zəng edib soruşdum ki, bəlkə doğrudan da belə bir əməliyyat planlaşdırılır və məndən gizli saxlanılır?! Həkimim də təəccübləndi ki, bəs, Müslüm, haradan götürmüsən bu məlumatı? Əgər belə bir əməliyyat planlaşdırsayıq, bu barədə Sənə birinci xəbər edərdik».

Müslüm Maqomayev bir sıra qəzet və informasiya agentliklərini hər hansı məlumatı yaymaqdan əvvəl diqqətli olmağa çağırdı. Onun sözlərinə görə, bu cür uydurma informasiyalar onlara baş ucalığı gətirmir. Müğənni, belə məlumatların onun yaxınlarına və özünə də mənfi təsir etdiyini bildirdi.

Bizimlə telefon söhbətində müğənni indi özünü normal hiss etdiyini dedi. O, ötən gün ürəyindəki kəskin ağrılarla xəstəxanaya yerləşdirildiyini, vaxtında lazımi müayinələrin həyata keçirildiyini söylədi. «Hazırda evdə müalicəmi davam etdirirəm. Hər gün tibb bacısı gəlib çoxlu sayda iynə vurur, dərmanlar verir. Evdə özümü rahat hiss edirəm. Həkimlərim zəng edib mütəmadi olaraq səhhətimlə maraqlanırlar. Digər tərəfdən - özüm də xəstəxanada qalmaq istəmədim, çünki həddən artıq narahat oluram orada. Pərəstişkarlarım, məni istəyən şəxslər gəlib xəstəxananın həyətində dayanırlar, həkimlərdən hamısı məni soruşurlar, personal da aradanbir gəlir-gedir, ona görə də elə həkimim özü də mənim xahişimə diqqətlə yanaşdı və müalicəmi evdə davam etdirməyə icazə verdi».

Müslüm müəllim həmçinin ANS Pressin oxucularına salamlarını göndərdi və ona yetirilən diqqətə görə minnətdar olduğunu söylədi.

Aytən Səfərova ANS Press

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.