Rus bölməsinin abituriyentləri bu gün «Azərbaycan dili»ndən imtahan veriblər. Bu haqda Tələbə Qəbulu üzrə Dövlət Komissiyasının (TQDK) sədri Məleykə Abbaszadə bu gün keçirdiyi mətbuat konfransında deyib. Onun sözlərinə görə, imtahanda 2993 abituriyent iştirak edib. «Bu abituriyentlərdən 8 nəfəri Naxçıvan şəhərində imtahan verib. Bu gün imtahan verən abituriyentlərdən 1357 nəfəri qız, 1636 nəfəri isə oğlandır». TQDK sədrinin sözlərinə görə onlardan 1446 nəfəri cari ilin, 1547 nəfəri ötən illərin məzunları və 108 nəfəri isə xarici ölkələrin vətəndaşlarıdır. «İmtahan 45 dəqiqə ərzində aparılıb. Sınağa çəkilənlər 30 sualı cavablandımalıdırlar. Hər düzgün cavab bir balla dəyərləndiriləcək. Səhv cavabların isə düzgün cavablara təsiri olmayacaq. Abituriyent məqbul cavab alması üçün 10 bal toplamalıdır». M.Abbaszadə onu da qeyd edib ki, imtahanların nəticələri iyunun 23-də axşam saatlarında məlum olacaq. İmtahandan keçməyən abituriyentlərə gəlincə isə, M.Abbaszadə həmin şəxslərin ali məktəblərə imtahanlarda iştirak hüququnu avtomatik itirəcəklərini deyib.
Gülnaz Qənbərli /ANSPRESS/

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.