İyunun 6-da Sankt-Peterburqda Azərbaycan prezidenti İlham Əliyevin Ermənistanın yeni prezidenti Serj Sarkisyanla tanışlığı baş tutub. Xarici işlər Nazirliyinin mətbuat xidmətinin rəhbəri Xəzər İbrahim bildirib ki, bu görüşdən sonra rəsmi İrəvanın mövqeyi ilə bağlı fikir irəli sürmək hələ tezdir. Onun sözlərinə görə, prezidentlər xarici işlər nazirlərinə mövqelərin yaxınlaşdırılması istiqamətində tapşırıqlar veriblər: “Bundan sonra işlərin görülməsi istiqamətində tapşırıqlar verilib. Konkret bir şey demək hələ tezdir. Bilirsiniz ki, tanışlıq baş verəndən sonra konkret addımlar olmalıdır ki, biz hansısa irəliləyişdən danışa bilək. Lakin nəzərə alınsa ki, həmsədrlər regiona səfər edəcəklər, onların səfərlərindən sonra yəqin nəsə yeni bir şey deyə bilərik".

Ermənistan prezidenti Serj Sarkisyan rejimi ilə danışıqların qyeri-mümkünlüyünə gəldikdə, nazirlik rəsmisi bildirib ki, belə bir hal olsaydı, Azərbaycan tərəfi danışıqlara getməzdi. Ümumiyyətlə, danışıqlarda yeni təklif olmasa da, Xəzər İbrahim yeni şərait olduğunu bildirib: “Bu şərait də BMT Baş Assambleyasında qəbul edilən qətnamədən sonra yaranıb. BMT BA-nın qətnamə qəbul etməsindən sonra yeni şərait yaranıb. Bu beynəlxalq ictimaiyyət tərəfindən çox ciddi qəbul edilməlidir. Həmsədrlər təklif veriblər. Digər tərəfdən BMT-nin ortaya qoyduğu mövqe var. Ona görə o təkliflər də o mövqeyə uğün olmalıdır”.

Xəzər İbrahim mətbuat konfransında Gürcüstanın unikal abidələri adı altında BMT-də təşkil olunmuş sərgidə Azərbaycanın tarixi abidələrinin gürcüləşdirilməsi məsələsinə də munasibət bildirib. O, dost və strateji tərəfdaş olan bir ölkə tərəfəindən yol verilən səhvin dərhal aradan qaldırılacağını deyib.

Xatırladaq ki, sərgidə David Qareci kompleksinin Gürcüstan-Azərbaycan sərhəddində deyil, Gürcüstan ərazisində yerləşdiyini, Şəkidəki alban kilsəsinin Gürcüstana məxsus 10-11-ci əsr abidəsi olduğunu, Şəkinin Kiş kəndinin isə qədim Herati ərazisi kimi təqdim edildiyi stendlər nümayiş etdirilib.

“Gürcüstanla biz strateji tərəfdaşıq. Digər tərəfdən biz dost dövlətlərik və əgər hansısa bir anlaşılmazlıq səhv baş veribsə, biz onu dərhal dost şəraitində aradan qaldırılması üçün işlərimizi görürük və görəcəyik”.

Xatırladaq ki, Azərbaycanın BMT-dəki nümayəndəliyi faktların və tarixin təkzib olunduğu sərgi ilə bağlı Gürcüstanın Xarici Işlər Nazirliyinə müraciət edib və həmin stendlər sərgidən yığışdırılıb. /ANS TV/

© 2008-2009 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.