“Bu torpaq üçün vuruşmaq və ölmək zamanı gələndə Vahid Mustafayevlə Vahid Naxış bir yerdə olacaq”

-Vahid müəllim, Sizi təbrik edirəm. Efirə verdiyiniz ilk mahnı yadınızdadırmı?
-Azərbaycanın Respublika günü və ANS ÇM radiosunun yaranması münasibəti ilə sizi təbrik edirəm. Birinci musiqi (ANS ÇM-in musiqili pərdəsindən sonra) Viktor Tsoyun "Dalshe deystvovat budem mı" olub.

-Azərbaycan radio məkanında inqilab etməyinizdən 14 il ötür. Sizdən bir peşəkardan kimi soruşmaq istəyirəm: Necə hesab edirsiz, bu gün yeni texnologiyaların (mp3 player ve s.) həyatımıza daxil olmasının belə sürətlə getdiyi bir dövrdə, radio, musiqi dinləmək üçün bir vasitə olaraq hələ nə qədər qala bilər? Deyə bilərikmi, radiolar getdikcə musiqini öz efirlərində daha az verəcək?
-MP3 playerlərdən də öncə digər musiqi daşıyıcılarının olmasına baxmayaraq, radiostansiyalar mövcud idi. Və hər zaman radionun keyfiyyəti bazarda olan musiqi daşıyıcılarının keyfiyyəti ilə bərabər olub. Odur ki, texnologiyalar inkişaf etdikcə, radio da inkişaf edəcək. Lakin nəzərinizə əsas şeyi çatdırmaq istəyirəm: radio cansız MP3 playerdən fərqli olaraq sizin dostunuzdur, canlıdır. Və hər zaman sizin kefinizi kök, əhvalınızı yüksək, intellektinizi qulaq asdığınız radioyaya adekvat edəcək.

- Müasir dövrdə rəqabətdə uduzmayan radio necə olmalıdır?
- Uduzmayan radio konyukturanı nəzərə almayan, öz kefi ilə yaşayan və fəaliyyət göstərən radiodur. Ona görə ki, o, heç kimlə rəqabət aparmır.

- Bəzən ekranda mini yubkalı, açıq-saçıq qızlara görə mən valideynlərimlə birlikdə televizora baxa bilmirəm. Təəssüflər olsun ki, açıq-saçıq qızlar ANS-də də nümayiş olunur. Sizin kanal açıq-saçıq qızları nümayiş etməsə, Sizə və Sizin kanalınıza çox minnətdar olardım.
- Mən elə özüm də bu açıq-saçıqlığın əleyhinəyəm. Amma arada bir əldə etdiyimiz məhsullar arasında (məsələn, serial, bədii film və s.) qeyd etdiyiniz səhnələr bizim yayımımızda özünə yer tapır. Bu da daha çox zəmanənin kuryozlarıdır.

- Azərbaycanda azarkeşlik etdiyiniz, bəyəndiyiniz futbol klubu hansıdır?
- Mən şəxsən boksa daha çox meylliyəm. Futbolun konsepsiyası mənim üçün hələ də aydın olmadığından onu izləyə bilmirəm.

- 21 yaşım var. Məndə mediaya böyük həvəs var. Gələcək həyatımı da media ilə bağlamaq istəyirəm. Qəzet, radio, sayt, jurnal, TV və s. gələcəkdə görmək istədiyim proyektlərdir. Açığı artıq indidən imkanım və bacarığım daxilində bu işlərə başlamaq istəyirəm. Mənə illərini bu işə verən biri və bu işlərin içərisində olan biri kimi nə məsləhət görürsünüz? Mediada olmağa dəyərmi? İnanın ki, Sizin məsləhətiniz mənim həyatımı dəyişdirə bilər.
- Şəxsən mən mediada olduğuna görə təəssüflənməyən çox adam tanıyıram. Amma tanıdığım bir neçə adam da var ki, təəssüflənir. Bəziləri hətta həbsdədir. Bir neçəsi isə öldürülüb... Özüm sadaladığım bütün bu hallarla dəfələrlə rastlaşmışam. Odur ki, özünüz seçin: bu cür rəngarəng və maraqlı həyat sizi qane edir, ya yox.

- Niyə ANS TV-ni internetdə canlı izləmək olmur?
- ANS TV-ni internetdə canlı izləmək üçün biz burada layiqli provayder tapa bilmirik.

- Din haqqında veriliş açmaq fikriniz varmı?
- Sizin kimi tamaşaçı, dinləyici və oxuculara qulluq etməyi özümüzə şərəf bilirik. O ki, qaldı dini verilişə, inşallah, səbrli olun, Allah mərdiməzara lənət eləsin.

- Elə olubmu ki, dövlətin mənafeyi uğrunda hər hansı bir məlumatı, hökümətlə razılaşdırıb, cəmiyyətə dezinformasiya şəklində çatdırmısınız?
- Allah sizi güldürsün. Bizim hökumətlə münasibətlərimiz olsaydı, bizi 2006-cı ilin sonunda bağlamazdılar.

- Azərbaycan jurnalistlərinin həyatının təhlükədə olması fikri ilə nə dərəcədə razısınız?Həqiqətən belədirmi?
- Tamamilə razıyam. Amma tək Azərbaycanda yox. Dünyanın bütün yerlərində jurnalist peşəsi çox təhlükəli və məsuliyyətlidir.

- Bu yaxınlarda "Yeni Müsavat" qəzetində ANS-in Səfər Əbiyevlə xüsusi əlaqəsi olduğu vurgulanib. Buna munasibətiniz necədir?
- Biz ANS Şirkətlər Qrupu olaraq heç bir hökumət strukturları ilə kommersiya əlaqələrində bulunmuruq. Və buna ehtiyacımız da yoxdur.

- Kanalınızın aparıcıları, xususilə "Xəbərçi"nin aparicilarindan əksərinin xarici gorünüşləri qənaətbəxş deyil, eləcə də onların bəziləri ləhcə ilə danışır, xüsusilə cavan kişilərin bığlı veriliş aparmaları yaxşı hal deyil.
- Biz aparıcıları onların intellekt səviyyəsinə görə seçirik. Onların zahiri görünüşü bizi heç maraqlandırmır. (bura model evi deyil). O ki, qaldı ləhcə və tələffüzdə səhvlərə, mən belə bir faktla rastlaşmamışam. Diksiya məsələlərinə şirkətimizdə Azərbaycanın ən yüksək peşəkarları olan Sabir Ələkbərov və Şərqiyyə Hüseynova cavadehdir.

- Bir müddət öncə həbsdə olan jurnalistlər və onlara dəstək olaraq digər jurnalistlər tərəfindən aclıq aksiyasi keçirilmişdi. Bu aclıq aksiyasi barədə heç bir kanalda məlumat verilmədi. Bəlkə də onları başa düşmək olar, adları "özəl, mustəqil" olsa da, özlərinin kimə xidmət etdiyi aydındır. Bəs ANS? Ümumiyyətlə kanalınızın bağlandıqdan sonra 180 dərəcə dəyişməsini nə ilə əlaqələndirmək olar?
- Çox təəssüf olsun ki, proqramlarımızı izləməyən birisi olaraq bu cür ifadələr işlədirsiniz. Adıçəkilən mövzu haqqında ANS televiziya, radio və internet saytımızda dəfələrlə məlumat vermişik.

- Bəzən elə olur ki, kiməsə ehtiyac duyur insan.Belə hallarda kiminlə dərdləşib, söhbət edirsiniz?Yoxsa yalnızlığı, sakitliyi seçirsiniz?
- Mən də hər bir insan kimi özümdən böyüklərə daim müraciət edirəm. Şükür Allaha ki, mənim məsləhət verəcək böyüklərim var və Alahdan onlara can sağlığı arzu edirəm.

- ANS kanalında xəbərlər verilişinin adı “Xəbərçi” gedir. Hamının bildiyi kimi, bizim dilimizdə “Xəbərçi” kəlməsi mənfi mənada işlənir. Mənə maraqlıdır, Siz bu adı seçərkən həmin kəlməyə acıyıb, onu mənfi mənadan xilas edərək müsbət məna verməyi düşünüb, belə bir addım atmısınız? Yoxsa, elə bilirsiniz ki, bu cür qeyri-ənənəvi ad və ifadələr Sizə yenilikçi kimi populyarliq verəcək?
- Elə bilirəm ki, bu sual 1992-ci ilin noyabrın 26-dan qalmadır. Məncə, dəmirçi, kömürçü, ipəkçi və çörəkçi öz peşəsinin adı ilə nə qədər fəxr edirsə, "Xəbərçi" də öz adı ilə bir o qədər qürrələnə bilər.

- Siz bunlardan özünüzə hansını daha yaxın hesab edirsiniz? ANS PRESS, ANS TV, yoxsa ANS ÇM?
- Hamısını. Ona görə ki, hamısında ANS var.

- "Xəbərçi" bir neçə il əvvələ qədər o dərəcədə məşhur veriliş idi ki, onun əməkdaşlarını hamı adbaad tanıyırdı. Amma indi belə deyil. Çünki, indi "Xəbərçi"nin kollektivi jurnalistikada ilk addımlarını atan, jurnalistikanı bir peşə kimi seçib-seçməyəcəyini hələ özü üçün də müəyyənləşdirə bilməmiş gənclərdən ibarətdir. Bu verilişin səviyyəsinin artırılması üçün tədbirlər planlaşdırılırmı və kollektivin peşəkar xəbər komandasına çevrilməsi üçün hansı addımlar atılacaq? Axı qarşıdan prezident seçkiləri gəlir və həmin ərəfədə peşəkarlara daha çox ehtiyac olacaq.
- ANS-in istinad etdiyiniz, bir zamanlar adbaad tanınan jurnalistləri də nə vaxtsa ilk addımlarını atan, təcrübəsiz, dəliqanlı gənclər olub. Onları təcrübə və peşə vərdişləri peşəkarlığa və yaşa doldurub. İndi sizin çətinliklə tanıdığınız, təbirinizcə desəm, jurnalistikada ilk addımlarını atan əməkdaşlarımızın gələcəyinə inanıram. Əlbəttə, ola bilsin ki, onların da arasından kimlərsə daha zəif və daha az inadcıl çıxacaq. Amma bu heç də xəbərlərimizin keyfiyyətinə təsir göstərməyəcək. Şəxsən məndən ötrü ANS-in aparıcılarının yox, xəbərimizin tanınması şərtdir. İkinci olduqca birinci də olacaq.

- Vahid Naxış, yoxsa Vahid Mustafayev? Və niyə? Nə vaxtsa qəlbinizdən Çingiz ömrü yaşamaq keçib?
- Vahid Mustafayev ANS Şirkətlər Qrupunun prezidenti, Vahid Naxış isə telereportyordur. Bu torpaq üçün vuruşmaq və ölmək zamanı gələndə onlar bir yerdə olacaq. Çingiz ömrünü yaşamaq yalnız Çingizə xas idi. Mən Vahid ömrü yaşayıram və bu ömrə görə utanmıram. Üstəlik qarşımda yaşanmış Çingiz ömrü nümunə kimi dayanıb.

ANS Şirkətlər Qrupunun prezidenti Vahid Mustafayevin forumçuların suallarına cavablarını buradan oxuya bilərsiniz