YUNESKO-nun baş direktoru Koişiro Matsuura Dağlıq Qarabağdakı mədəni abidələrin qorunmasının vacib olduğunu deyib. Dağlıq Qarabağ probleminin siyasi məsələ olduğunu qeyd edən baş direktor münaqişənin həlli istiqamətində hələlik heç bir nəticə əldə olunmadığından, YUNESKO-nun da tarixi abidələrin qorunması ilə bağlı hansısa addım atmasının mümkün olmadığını bildirib. K. Matsuura YUNESKO-nun regiona fakt-araşdırıcı missiya göndərməyi planlaşdırdığını, ancaq səfərin nə vaxt baş tutacağının hələlik məlum olmadığını söyləyib.

“YUNESKO siyasi məsələlərlə məşğul olmur. Bununla BMT-nin özü məşğul olur. Bu səbəbdən də Dağlıq Qarabağ məsələsi və yaxud Azərbaycanın ərazi bütövlüyü YUNESKO-da yox BMT-də baxılmalıdır. Amma siz səhv deyilsiz, YUNESKO beynləxalq təşkilat olmaqla mədəni irsə görə məsuliyyət daşıyır və işğal olunmuş ərazilərdə mədəni abidələrin qorunmasına baxmalıdır. Bizim hökumətlərlə bu barədə kontaktlarımız olub. Münaqişə ilə bağlı Azərbaycan və Ermənistan arasında ikitərəfli danışıqlar aparılır. Təssüf ki, bu danışıqların nəticəsi yoxdur. Nəticə olaraq həmin ərazilərdə mədəni abidələrin qorunmasını, yoxlanılmasını həyata keçirmək elə də asan deyil. Biz bu problemdən xəbərdarıq və tərəflər arasında siyasi razılıq olmadan biz hazırki vəziyyətdə fəaliyyət göstərə bilmirik” – deyə YUNESKO-nun baş direktoru Koişiro Matsuura bildirib. /ANS TV/

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.