Ermənistanın yeni prezidenti Serj Sarkisyan Rusiyadan başladı. Və onun dövlət başçısı olaraq ilk adımını Moskvaya atmasında maraqlı bir şey görməzdik. Amma bir sıra xırda ştrixlər olmasaydı. Əvvəla Serj prezident qoyulması münasibətilə onu birinci təbrik edən Rusiyanı seçməklə bu ölkənin misilsiz dəstəyinə əhəmiyyət verdiyini sübut etdi. İkincisi Azərbaycanın Qarabağ uğrunda apardığı barışmaz diplomatik mübarizə fonunda Ermənistan bu səfər zamanı Rusiyada həm də Kollektiv Təhlükəsizlik Müqaviləsinə bir il ərzində rəhbərlik edəcəyi barədə məsləhətləşmələr aparacaqdı. Xatırladaq ki, dinc insanların kütləvi şəkildə qırılması ilə yadda qalan Xocalı əməliyyatının müəllifi Sarkisyanın indi MDB Ordusunun başına keçməsi bir az maraqlı məsələdir. Yəni bu komandanlıq təzə deyil. Artıq Serjin 1992-ci ilin fevralında bu qüvvələrin sələfi olan ordunun 366-cı motoatıcı polkuna rəhbərlik etməsi və Xocalıya girməsi tək bir təcrübəsi var. İndi isə bütün MDB ordusu Sarkiyanın əlində olacaq. Mən Azərbaycan əskərini qorxutmaq niyyətində deyiləm və yəqin NATO standartlarına uyğun olaraq formalaşan, döyüşən və hətta şəhid olmaqdan belə çəkinməyəan hərbçilərimiz köhnə sovet şinelində yerində addımlayan MDB soldatlarının mövcudluğundan əndişələnmirlər də. Və Heç ona görə də yox ki, bir yandan Azəbaycanın işğal olunmuş ərazilərində vəziyyətlə bağlı BMT qətnaməsinə səs verən, digər tərəfdən isə həmin işğalçının rəhbərliyi altında KTM-də döyüşəcəyini rəsmiləşdirən və bununla da Qurumun nəzəri hədəflərindən biri ola biləcək Azərbaycanla barrikadanın düşmənə aid hissəsində dayanan Özbəkistan kimi müttəfiqlər bizdən ötrü çox ciddi rəqiblər ola bilər. Yəqin elə bu səbəbdəndir ki, biz Qazaxıstan, Qırğızıstan və Özbəkistan kimi türkdilli qardaşlarmızın igidliyin doqquzu səbəbindən adətən bizim yanımızda olmamasına heç vaxt əhəmiyyət verməmişik. Adətə görə Rusiya-Ermənistan müttəfiqliyi də bizdə təəccüb doğurmayıb. Bölgədə Rusiyanın fövqəladə və səlahiyyətli nümayəndəsi olan Ermənistan Levon Ter Petrosyanın rəhbərliyi altında başlayan, sonra isə ümummilli azadlıq hərəykatına çevrilən hadisələrin əslində Rusiyaya qarşı çevrildiyini anladığından ən qəti hərəkətlərə keçdi və sadə camaat nahaq yerə öz hakimiyyətini rusun əmri ilə əhalini qırmaqda ittiham etmir. Bu baxımdan Sarkisyan Moskvaya həm də kök bir «Molodes!» üçün də getmişdi. Deyəsən aldı da. Həm Putinlə, həm Medvedyevlə görüşən Serj xidmətlərinin müqabilində tapmacalı rus qəlbinə daxil olduğuna tam əmin olduğuna inandı və Kremli əmin etdi ki, Ermənistan bundan sonra da Rusiya ilə əməkdaşlığı dərinləşdirəcək. Elə buradaca mənə elə gəlir ki, balaca bir quş buraxdı. Yəni Serj Medvedyevə təşəkkür etdi ki, Rusiya Ermənistana heç vaxt olmayan dəstəyi göstərib. Bu cümlənin bir mənası o ola bilər ki, mövcudluğuna görə gərək ömrünün sonunadək Kremlin ayaqlarına düşəsi Ermənistan əslində Rusiyanın indiyədək ona göstərdiyi yardımı kifayət hesab etmirmiş. Ya da Ermənistana ona qədər rəhbərlik etmiş şəxslərə edilən yardımlar kov deyilmiş. Sarkisyan eksklüziv olaraq ona edilmiş köməyi xüsusi qiymətləndirir. Seçkidən əvvəl və seçkidən sonra Kremlə, sadə erməni camaatının təbirincə desək, öz sədrindən təlimatlar almağa yollanmış Serj həm də kartları açmış oldu. Heç demə erməni xalqının müstəsna səlahiyyəti olmalı olan seçki hüququ əslində başqa bir ölkənin proseslərə müdaxiləsini ört-basdır etməyin bir yolu imiş. Beləliklə Sarkisyan öz təşəkkürü ilə erməni xalqının şübhələndiyi, amma konkret faktlara malik olmadığından o qədər də birbaşa dilinə gətirmədiyi gerçəyin üstünü açdı. Serj hakimiyyətə gəldiyinə görə erməni xalqına yox, Rusiyaya minnətdarlıq ifadə etdi. Sevincək Sarkisyan bir az da irəli gedərək Moskvaya söz verdi ki, respublika hökuməti ölkədə sabitliyi təmin etmək üçün hər şeyi etmək əzmindədir. Bax belə. İndi mən bilmirəm bu yeni prezidentin səhvi, yoxsa Kremlə daha dərinə, daha dibədək girməyin ifrat yolu idi. Amma Medvedyev belə açıq-saçıq minnətdarlığı, ifşa riskini gözləmədiyindən diplomatik təmrinə əl atmalı oldu. Sadəcə qeyd etdi ki, Rusiya-Ermənistan münasibətləri hadisələrin necə inkişaf etməsindən asılı olmayaraq inkişaf edəcək. Amma Medvedyevin etmədiyini Rusiyanın Baş naziri Zubkov etdi. O da elə Sarkisyan kimi açıq şəkildə söz verdi ki, Ermənistan bundan sonra da Rusiyanın dəstəyinə bel bağlaya bilər. Bu da belə. Sarkisyanın Moskva səfəri İrəvanda kütləvi həbslərin davamı və repressiya tədbirlərinin intensiv və ekstensiv şəkil alması ilə müşayiət edildi. Maraqlıdır ki, indi bu həbslərin hədəfləri müxalifət liderləri deyil. Küçədə sadəcə gəzib dolaşanlar, şahmat olmayanlar, iki bir-üç bir toplaşanlar-bütün bunlar hamısı bir anda həbsxanalara atıla bilərlər. Bir yandan baxanda bu bəlkə də sadə erməninin xeyrinədir. Evində oturub acından ölməkdənsə həbsxanada heç olmazsa gündə 3 dəfə pulsuz yemək imkanı var. Həm də bu indi Ermənistanda təhlükəsiz yaşamağın nadir yollarından biridir. Artıq müxalifət liderləri Ermənistanda terror hadisələrinin, parlayışların proqnozlarını verir. Həbsxanada isə artıq sənin əlindən heç kəsin ala bilməyəcəyi azadlıq var…

Mir Şahin

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.