İki gündən sonra Ermənistanda prezident seçkiləri keçiriləcək. Prezidentlik postu uğrunda baş nazir Serj Sarkisyan, eks prezident Levon Ter-Petrosyan, parlamentin keçmiş spikeri, Orinats Yerkir partiyasının lideri Artur Baqdasaryan, Daşnaksütün Ermənistan İnqilabi Federasiyasının rəhbəri Vaan Ovanisyan, Milli Birlik Partiyasının lideri Artaşes Geqamyan, Xalq Partiyasının rəhbəri Tiqran Karapetyan, Milli Demokratik İttifaqın sədri Vazgen Manukyan, Milli Barışıq Partiyasının rəhbəri Aram Arutyunyan və nəhayət separatçı Dağlıq Qarbağ rejiminin keçmiş xarici işlər naziri Arman Melikyan mübarizə aparır. Təbliğat kampaniyası dövründə ən kəskin çıxışlar Levon Ter-Petrosyana məxsus olub. Hakimiyyətin korrupsiyaya qurşandığını deyən prezidentliyə namizəd Sarkisyan-Koçaryan cütlüyünü keçmiş baş nazir və spikeri aradan götürməkdə ittiham edib.
Serj Sarkisyan isə diplomatik görüntü yaratmaqla necə deyərlər həccə gedir: "Bu siyasət iqtisadi inkişafın davamından, Avropa ailəsinin üzvü olmaqdan, qonşularla münasibətləri normallaşdırmaqdan və Qarabağ münaqişəsinin dinc yolla həllinə nail olmaqdan ibarətdir"

Namizədlər Qarabağ kartından bu dəfə də geninə-boluna istifadə ediblər. Hətta reklam çarxlarında da Dağlıq Qarbağın işğalında iştirak etmələrini fəxrlə nümayiş etdirərək bununla əlavə xal qazanmağa çalışıblar. Bu taktikadan ən çox istifadə edən isə millətçi Daşnaksütyun partiyasının lideri, prezidentliyə namizəd Vaan Ovanisyan olub.

Digər namizəd Orinats Yerikirin lideri Artur Baqldasaryanın əsas tənqid hədəfi hakimiyyət olub. Yerdə qalan rəqiblər isə çıxışlarını daha çox Levon Ter-Petrosyanı tənqid üzərində qurublar. İddiaçılar arasında Sarkiyan, Ter-Petrosyan və Baqdasaryan daha şanslı hesab olunarlar. Həm Levon Ter-Petrosyan, həm də Serj Sarkisyan və onların tərəfdarları öz namizədlərinin elə birinci turda qələbə qazanacağı düşünürlər. Son rəy sorğularına görə Erəmnistan əhalisinin 75 faizi Levon Ter-Petrosyana səs verməyə hazırdır. Eks prezidentin ötən gün paytaxtda 230 min tərəfdarını iştirakı ilə keçirdiyi seçki kampaniyasının ən izdihamlı mitinqi də bu statistikanın ağlabatan olduğunu deməyə əsas verir. Etiraz aksiyasında Artur Baqdasaryanın rəhbərlik etdiyi Orinats Yerkir Partiyasının minlərlə üzvü Levon Ter-Petrosyanın rəhbərlik etdiyi hərəkata qoşulub. Amma Artur Baqdasaryanın düşərgəsində düşünürlər ki, birinci turda prezidentin kimliyi müəyyənləşməyəcək. İkinci tura isə Serj Sarkisyanla Artur Baqdasaryan keçəcək. Bəzi analitiklərə görə, hakimiyyət də seçkinin azad və demokratik keçirilməsi ilə bağlı görüntü yaratmaq məqsədilə ikinci tura eks spiker Artur Baqdasaryanın keçməsinə şərait yaratmaq niyyətindədir. İkinci turda isə Serj Sarkisyan 'ədalətli qələbə' qazanacaq.

Elə hakimyyət meylli sorğular da artıq bu ssenarinin kifayət qədər ağlabatan olduğunu deməyə əsas verir. Məsələn, Sosio Ermənistan sorğu xidmətinin apardığı sorğunun nəticələrinə görə, respondentlrin 53.1 faizi Serj Sarkisyana səs vermək niyyətlərini açıqlayıblar. Sonrakı yerləri isə 12.6 və 11.3 faiz səslə Orinas Yerkir partiasının lideri, eks-spiker Artur Baqdasaryan və Ermənistanın birinci prezidenti Levon Ter- Petrosyan tutur.

Moskvanın da bu seçkilərdə kimə dəstək verəcəyi də, erməni ictimaiyyətini az düşündürmür. Seçki kampaniyasının ilk vaxtlarından Rusiyanın yüksək rütbəli dövlət rəsmilərinin bir -birinin ardınca Ermənistana səfər etmələri yalnız bu ölkədə yox, Ermənistanın hüdularından kənarda da rəsmi Moskvanın hakimiyyətin namizədini dəstəklədiyi haqda fikir formalaşdırıb.
Rusiyanın kütləvi informasiya vasitələri də xüsusilə baş nazir Viktor Zubkovun seçki kampaniyasının qızğın vaxtı İrəvana səfərini Moskvanın Serj Sarkisyana çıddi dəstəyinin nümayişi kimi qiymətləndirdilər. Eks-prezident Levon Ter-Petrosyan Rusiya amilini nəzərə alıb. Moskva təfərrüatları o qədər də açıqlanmayan səfər, kremlin gələcək sahibi Medvedyevlə görüşdən sonra Ter-Petrosyan belə görünür: "Rusiya Ermənistanı özünün mühüm tərəfdaşı kimi görür. Amma bu tərəfdaşın kimliyi heç də Moskva üçün az əhəmiyyət daşımır. Rusiyada Ermənistan dövləti ilə Ermənistan administrasiyasını yaxşı ayırd edirlər. Moskvaya öz xalqının etimadını qazanan namizəd lazımdır. Rusiya hazırkı administrasiyanın belə olmadığını düşünür. Amma fevralın 19 -da ümumxalq səsverməsi nəticəsində seçilmiş namizəd məhz bu cür olacaq. Həmin namizəd sizin sadiq bəndənizdir".

Sabah sükut, birisi gün isə səs günüdür. Kiminin səsinin əvvəl, kiminin səsinin sonra çıxacağı isə tezliklə bəlli olacaq. /ANS TV/

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.