Mənə elə gəlir ki, acın toxdan xəbəri olmadığı kimi, millət vəkillərimizin də onlara etimad götərib seçən xalqın çəkdiklərindən xəbərləri yoxdur. Hörmətli millət vəkillərimiz, söhbət xalqın çəkdiyi siqaretin markasından getmir a, onları həyatdan bezdirən problemlərdən gedir. O problemlərdən birini siz parlamentin ötən iclasında qaldırdınız.

QAZ PROBLEMİ

    Amma nədənsə, QAZı buraxıb onun dəmindən danışdınız. Nədəni hamıya, həmçinin seçicilərinizə də məlumdur. Hörmətli millət vəkillərimizdən Fazil Qəzənfəroğlunun oğlu və qaynı dəm qazından zəhərlənərək vəfat etdi. Bu hadisəyə Fazil Qəzənfəroğlunu yaxından tanıyan bir şəxs kimi, mən də çox üzüldüm. Səmimi deyirəm, atamın timsalında övlad itkisinin nə demək olduğunu başa düşdüyüm üçün Fazil Qəzənfəroğlunun halına çox yandım.

    Amma məni düşünüdürən odur ki, niyə millət vəkillərimiz 149 nəfər dəm qazından boğulub öləndə, 200-dən çox şəxs zəhərlənib xəstəxanya düşəndə bu barədə danışmadılar? Gözləyirdilər ki, İran sobasının dəmi onlara da toxunsun, dəm qazından ölənlərin sayı 151 olsun? Heç kəs inciməsin məndən, amma belə çıxır. Belə olmasaydı 149 nəfər dəm qazından boğulub öləndə məsələ qaldırardılar ki, İrandan gətirilən istilik sobaları standartlara cavab vermir, gəlin araşdıraq görək, bu STANDARTSIZ ƏZRAİLLƏRİ ölkəmizə KİM gətirir. Yoxsa sizə məlum deyil, o sobaları gətirən iş adamlarının kimliyi?! Bilmirsiz ki, bu məmləkətdə hər yerindən duran gedib İrandan və ya başqa bir ölkədən bu cür standartsız şeyləri gətirə bilməz?!

    Kiminsə düşdüyü fəlakətdən öz mənafeləri üçün istifadə edən "biznesmen" millət vəkillərimizin bu məsələnin arxasında duran maraqlarından bəhs edib qaysaqlamamış yaranı qanatmaq fikrində deyiləm. Amma bəlkə bu problemi vaxtında qaldırsaydınız, inanın ki, İran sobası da sizi bu qədər yandırmazdı.

    Hələ mən demirəm ki, niyə dövlət məmurlarımızdan birinin bu barədə tənqidi bəyanatlarından sonra parlamentdə İran sobalarının standartsızlığından dınışırsınız? Mən sizi nə o məmurla ortaq maraqlarınızın olduğunda ittiham etmək fikrindəyəm, nə də onun sifarişi ilə Milli Məclisi dəm qazı ilə doldurduğunuzu iddia etmək. Amma başa düşə bilmirəm ki, prolemin kökünü qoyub quyruğundan niyə yapışırsınız?! Yoxsa, bilmirsiniz ki, problem İran sobalarında yox, əhaliyə sırınan qazdadır?!

    Üzr istəyirəm, Siz bilməyə bilərsiniz. Axı, Sizin mənzillərinizdə nə istilik problemi var, nə qaz, nə işıq, nə də su. Biz qara camaatıq bu problemlərin əziyyətini çəkən, Siz yox.

    Hörəmtli deputatlarımız, bəndəniz sizin bu SOS siqnalından sonra, problemin kökündə nəyin durduğunu bilə-bilə bir neçə QAZ mütəxəssisi ilə danışdım. Onlar problemi sobada yox, əhaliyə verilən qazın təzyiqində və stabil olmamsında görürlər. Yəni əslində sizin dediyiniz o sobalar standartlara cavab verir. Amma bizim əhaliyə, "Azəriqaz"ın dili ilə desək, obonentlərə verilən qazın standartlarına, yəni təzyiqinə uyğun gəlmir. O sobaların normal işləməsi üçün ən azından əhaliyə verilən qazın normal təzyiqi olmalıdır. Bu olmadığına görə, camaat İran sobalarını bizim standartlara uyğunlaşdırmaq məcburiyyətində qalır. Nəticədə Sizi də yandırır, bizi də.

    Və yaxud da gecəyarısı qaz kəsilir və səhərə yaxın yenidən verilir.... Az olub belə faktlardan əziyyət çəkənlər, həyatını itirənlər?!

Niyə bundan danışrımısınız?!

    Heç olmazsa 5 illik fəaliyyətinizdə bircə dəfə də olsun özünüzün yanmamağınız üçün xalqı yandıran problemlərdən danışın. Cavabdeh şəxslərin yaxasından tutub silkələyin ki, bu millətə niyə qaz verilmir, niyə havalar bir az soyuyan kimi gün ərzində şəhərin göbəyində 7-8 saat işıq olmur? Ölkənin qışa hazır olması ilə bağlı bizi də, prezidenti də aldatdığınız yetər! Bircə dəfə də olsa, yumruğunuzu masaya çırpıb deyin ki, bəsdi "Azəriqaz", camaatı qazladın! Bəsdi camaatın kürəyinə samovar bağlayıb nahaqdan cərimələdin! Niyə bu barədə danışmırsınız?! Ona görə ki, sizin belə bir probleminiz yoxdur?!

Axı niyə danışasınız?

    Məgər «Azəriqaz»ın hansısa nümayəndəsi hər gün qapınızı döyüb deyir ki, Sizin mənzilinizdə samovar olub, biz gəlməmişdən qabaq götürmüsüz, filan qədər borcunuz var, ödəyin qaz verək. Gözləyirsiniz ki, bu hadisə Sizin də başınıza gəlsin, ondan sonra səsinizi çıxarasınız?!

    Ehtiyatlı olun, «Azəriqaz»ın samovarı kürəyinizi yandırmasın...

Zülfüqar Xeyirxəbər

P.S. Yazı hazırlanan ərəfədə bölgə müxbirimiz xəbər verdi ki, Astarada bir ailənin üç üzvü dəm qazından boğulub. Hörmətli millət vəkillərmiz, siyahını artırın: İndi dəm qazından ölənlərin sayı 151 deyil, 154 nəfərdi. Demə o bədbəxtlərdə İran sobasından istifadə edirmiş. Allah hamınıza rəhmət eləsin!

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.