Helsinkidə keçirilmiş bu ilki «Eurovision» mahnı müsabiqəsi geniş teleizləyici kütləsi üçün bəlkə də sensasion nəticələndi. Yarışa ilk dəfə müstəqil dövlət kimi qatılmış Serbiyanın təmsilçisi Mariya Şerefoviçin serbcə oxuduğu «Molitva» mahnısı rəqiblərini çox geridə qoyaraq birinci oldu. Sensasion olan bu nəticə bir qədər də bizə xoş gəldi. Hər halda ruscaya çox bənzəyən serbcədə oxunan mahnının demək olar ki, sözlərinin 70 faizini anlayırdıq. Həm də müğənni xanım yarışmadan öncə jurnalistlərə atasının türk olduğunu, ən böyük dəstəyi də Türkiyədən gözlədiyini demişdi. Soyadındakı «Şərəf» sözü, həmçinin qaraşın girdə sifəti müğənni xanımın yalan demədiyini, damarında məhz bizim soyun qanını daşıdığını isbatlayırdı. Bütün bunlar öz yerində… Amma məsələyə bir az ədalətlə baxanda serbcə oxunmuş «Molitva»nın baş mükafata layiq olmadığı açıq-aydın gözə çarpırdı. Elə həmin «Eurovision-2007»-də, elə həmin serbcədə «Molitva»dan qat-qat yaxşı mahnılar səsləndi. Məsələn, Sloveniyanı təmsil edən müğənni opera səsi ilə serbcəni anlamayan dinləyicilərin də çox xoşuna gələn möhtəşəm bir ifa nümayiş etdirdi. Onun kompozisiyasının çox gözəl olduğunu İTV-də «Eurovision-2007»-ni canlı şərh edən çox hörmətli bəstəkarımız Vaqif Gərayzadə dəfələrlə vurğulamışdı. İngiliscə oxuyan Boqarıstan təmsilçiləri də çox gözəl oxumuşdular. Onların musiqi kompozisiyası da çox gözəl idi, sanki bolqarların atalarının hardasa min illərin o üzündə türkcə danışdığını isbatlamağa çalışırdılar. Müğənnilər Uzaq Şərq davulları çalır, ağızlarında Altay türklərinə məxsus komısı, yəni ağız qopuzunu səsləndirirdilər. Vaqif Gərayzadənin çox ümid bəslədiyi bir iştirakçı - Moldaviya təmsilçisi də vardı. Xanım həm skrpikada özü ifa etdi, həm də çox geniş diapazonlu səsi ilə çox gözəl olan mahnısını hamının anladığı ingiliscə oxudu. Amma sadaladığımız bu iştirakçıların heç bir «Eurovision-2007» liderləri sırasına çıxa bilmədilər. Qalibiyyəti onlardan xeyli zəif olan «Molitva» götürdü.
Əcaba, Avropada zövqlər bu qədərmi əcaibdir?.. Hər kəsin anladığı ingiliscədə çox yüksək diapazonlu bir səslə oxunan çox gözəl bir musiqi uğur qazana bilmir, əvəzində məhəllə dilində oxunan məhəlli musiqi uğur qazanır?..
Əslində belə deyil, Avropanın musiqi zövqü də, Avropanın duyumu da yerindədir. Sadəcə Avropa İttifaqının rəsmiləri «Eurovision»-a bir siyasi təsir vasitəsi kimi baxırlar. Hansı ölkənin əlindən çörəyini almaq istəyirlərsə, onun başına bir «Eurovision» sığalı çəkirlər. Məsələn, üç il qabaq bu yarışmanı Türkiyə qazanmışdı. Həmin vaxt Kiprin şimalında və cənubunda olan hissələrinin birləşərək bir yerdə Avropa Birliyinin tərkibinə girməsi barədə referendum keçirilmişdi və Türkiyənin «Avropa aşiqi» olan indiki postmodernist-xilafətçi iqtidarı buna razılıq vermişdi. Yəni referendumdan müsbət sonuc çıxsaydı Avropa Birliyi Kiprin şimal hissəsini «hap» edib udacaqdı və adanın şimal sahillərindəki dənizi 52 mil enində nəzarətə götürəcəkdi. Nəticədə, Türkiyənin hərbi gəmilərinin bir sahil şəhərindən o biri sahil şəhərinə getməsi mümkün olmayacaqdı və Türkiyə Ordusunun manevr imkanları dəfələrlə aşağı düşəcəkdi. Türkiyəni o fəlakətdən sadəcə adanın yunan sakinlərində olan türkofobiya xilas etdi. Onlar adanın türk sakinləri ilə bir dövlətdə yaşamaq istəmədilər.
Türkiyədən sonra «Eurovision»un qalibi olan Ukraynada isə Qərbin oyunları «narıncı inqilab»la nəticələndi və Avropanın lakeyləri hakimiyyətə gəldilər. Onların iki illik siyasətinin nəticələri göz qabağındadır: Ukrayna bir-birinə düşmən olan iki ölkəyə Malarossiyaya və Novorossiyaya bölünməyin ərəfəsindədir. Malarossiya Kiyev Rusunun varisi olan bir ərazisidir və orda ənənəvi Ukrayna millətçiliyi hakimidir. Novorossiya isə Yekatrinanın dövründə Rusiya İmperiyasının tərkibinə keçmiş tarixi türk əraziləridir. Novorossiyada əsasən slavyanlaşımış kazak və tatar türkləri yaşayır. Artıq ruhca və tarixi ənənəcə bir-birinə yad olan bu ərazilərin ayrılması qaçılmaz görünür. Bu siyasətin başında Qərbin Avropanın içində Fransadan böyük, texnoloji cəhətdən inkişalı bir dövləti görmək istəməməsi dayanır.
İndi Serbiyanın başına çəkilən tumar isə Kosovo ilə bağlıdır. Bir-iki gündür ki, BMT-də Kosovanın Serbiyanın tərkibindən çıxaraq müstəqillik qazanması məsələsinə baxılır. Bu məsələ Belqradda müəyyən qədər narahatçılığa yol açsa da «Eurovision» bayramı bu odun üzərinə su səpdi.
Allah bizi «Eurovision» uğurundan qorusun. Hər halda, bizim də Kosovo probleminə oxşar Qarabağ problemimiz var…

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.