Ağdamda 1 nəfərin ölümü və 1 nəfərin də yaralanması ilə nəticələnən ağır yol qəzası baş verib.

ANS PRESS-in bölgə müxbirinin verdiyi məlumata görə, hadisə Hindarz-Borsunlu yolunun Ağdamın Alıbəyli kəndi ərazisində baş verib.

Belə ki, Hindarx istiqamətində hərəkət edən Ağdamın Əfətli kənd sakini Şakir Məhərrəmovun idarə etdiyi "Mercedes" markalı avtomobillə əks istiqamətdə hərəkət edən Ağcabədi rayonunun Poladlı kənd sakini Əli Dadaşovun idarə etdiyi "Vaz 21011" markalı avtomobil toqquşub.

Qəza nəticəsində ağır bədən xəsarətləri alan ikinci avtomobilin sürücüsü xəstəxanaya aparılarkən yolda dünyasını dəyişib. Digər sürücü isə hazırda Ağdam rayon Mərkəzi Xəstəxanasındadır.

Faktı Ağdam Rayon Polis Şöbəsi araşdırır. Qəzanın səbəbləri də araşdırmanın sonunda məlum olacaq.