Peşəkar şairlərlə nəğməkar şairlər söz davasına çıxdılar

Baba Vərizoğlu hirsləndi, Zəlimxan Yaqub isə onları cəfəngiyatda təqsirləndirdi

Şou-biznesin istənilən sahəsində bölgü var. Həmin bölgü ən çox müğənnilər və bəstəkarlar arasında yaranıb. Bəs görəsən şairlər arasında da belə bölgü varmı? ANSPRESS-ə açıqlama verən şairlər həmin bölgünü izah etməyə çalışdılar.

Baba Vəziroğlu: "Cızma-qara ilə məşğul olana nəğməkar şair deyilir"

- Dostoyevskinin məşhur bir sözü var: «Vətənpərvərlik əclaflar üçün ən son sığınacaq yeridir". Var şair və şair olmayan. Var şeir, cızma-qara və ya janrı məlum olmayanlar. Təbii ki, onlara şeir demək olmaz. Nəğməkar şair adlı konkret elmi bir ifadə yoxdur. Şair olmağa qüdrəti çatmayan, eyni zamanda cızma-qaralarla məşğul olan adama nəğməkar şair deyilir. Həmin insan bilmir ki, özünü hansı təyinat, hansı sifət və ya hansı bölgü ilə təqdim eləsin. Çarəsizlikdən adının qarşısına "nəğməkar şair" əlavə edir. Bugünkü şou-biznesin müğənniləri də elə o gündədir: nə oxuduqları mahnıya, nə də onun sözlərinə fikir verirlər. Ağızlarına gələni oxuyurlar.

Zəlimxan Yaqub: "Nəğməkar şair", "peşəkar şair" bunların hamısı cəfəng sözlərdir"

- Ümumiyyətlə, "nəğməkar şair", "peşəkar şair"sözü yoxdur. Bunların hamısı cəfəng sözlərdir, qondarmadır, sünidir. Söhbət əgər həqiqi şairlikdən gedirsə, onun qəlbində müğənnilik də, aşıqlıq da, Məcnunluq da, Kərəmlik də, Şeyxlik də, övliyalıq da olmalıdır. Nə nəğməkar şair? Nə bəstəkar-şair? Boş-boş söhbətlərdir. Şair şerini şeir kimi yazmalıdır. Sözsüz ki, onun da sözlərinə müğənnilər mahnı, xanəndələr muğam, təsnif, aşıqlar qoşma oxuya bilər. O cümlədən mənim də bir sıra şeirlərimi xanəndələr, aşıqlar oxuyur. Mən heç birinə nə zəng edirəm, nə pul verirəm, nə xahiş edirəm, nə də ki maraqlanıram. Şair gözəl əsərlər yaratmalı, şeirləri dillər əzbəri olmalıdır.

Leyli : "Mən nəğməkar şairəm"

- Mən nəğməkar şairəm. Amma yazdıqlarım cızma-qara deyil. Nə vaxtsa hansısa müğənnidən sözlərimə yazılan mahnını oxumağı xahiş etməyim yadıma gəlmir. Hətta Röya, Elnur, Zamiq belə sözlərim xoşuna gəldiklərinə görə oxuyublar. Söz su kimidir - axıb, çuxurunu tapır. Mən öz ürəyimdəkiləri yazıram və onlar mənim üçün dəyərlidir, qiymətlidir. Nəğməkar şairin işi peşəkar şairdən bir az asandır. Son zamanlar "balvanka", yəni hazır musiqiyə söz yazanları da qınamağa başlayıblar. Axı "balvanka"nı da hər adam yaza bilmir. Burda say, ölçü mühüm rol oynayır. Hər nota bir heca düşməlidir. Və onu düzgün yazmalısan ki, bölgü düzgün olsun.

Zemfira Əlişqızı: "Nəğməkar şairlər daha çox tanınır"

- Bizi digərlərindən fərqləndirən dilimizin sadəliyi, sözün məzmunluğu, yadda qalımlığı və axıcı olmasıdır. Mərhum şairimiz Nüsrət Kəsəmənli mənim ikinci kitabıma ön söz yazanda belə bir cümlə də işlədib: "Mən sevinirəm ki, nə vaxtsa dünyada olmayanda Zemfira Əlişqızını məhəbbət şairəsi kimi çağıracaqlar". Əgər mənim heç bir sözümə mahnı yazılmasaydı, bəlkə də mən bu gün Zemfira Əlişqızı kimi tanınmazdım. Əsrlərdən bəri belə olub: hansı şairin sözünə musiqi yazılıbsa, yaddaşlarda da o qalıb. Nəğməkar şairlər daha çox tanınır. Fəxr edirəm ki, mənim 700-1000-ə yaxın şeirimə mahnı yazılıb.