F1-in ilk yürüşünün qalibi bəlli oldu

"Red Bull Racing” komandasının pilotu dönmə əməliyyatını uğurla yerinə yetirə bilməyib.
"Formula 1" ikinci test yürüşü
"Formula 1" ikinci test yürüşü

17:10 / İkinci yürüş başladı

İyunun 17-də saat 17:00-da Formula-1 Avropa Qran-prisinin ikinci test yürüşü başlayıb. İkinci yürüşdə də hər biri iki pilotdan ibarət 11 komanda iştirak edir.

Birinci test yürüşü bu gün saat 13:00-da başlayıb. Yürüş nəticəsində bir pilot qəzaya uğrayıb, bir neçə pilot isə yolu səhv salıb. 

Birinci yürüşün lideri “Mercedes”in britaniyalı pilotu Luis Hamilton olub.

15:46 / Birinci test yürüşünün nəticələri

“Mercedes”in pilotu Luis Hemilton Bakıdakı ilk sınaq yarışı zamanı ən yaxşı nəticəni göstərib. ANS PRESS-in məlumatına görə, Bakı trasında ilk dəfə çıxan pilotlar yürüşə ehtiyatla başlayıblar.

McLaren pilotları Fernando Alonso və Censon Battonun fikirincə, simulyatordan fərqli olaraq realda tras bir az dardır.

Pilotlar üçün yeni olan trassda səhvlər də az olmayıb: Esteban Qutyerres, Daniil Kvyat, Sebastyan Fettel, Markus Erikson, Kevin Maqnussen və Colion Palmer yollarını azıblar.

Döngələrdən birində Luis Hemilton divara dəyib, bir neçə saniyə sonra isə 15-ci döngədə test yürüşünün ilk ciddi qəzası baş verib. Yürüşün sonuna 23 dəqiqə qalmış Danniel Rikardo döngədə sürət həddini düzgün tənzimləmədiyi üçün arxa sağ təkəri ilə maneəyə çırpılıb. Nəticədə bolidə ciddi ziyan dəyib və indi “Red Bull Racing”in mexanikləri bolidi 2-ci məşqə hazır etmək üçün ciddi çalışmalıdırlar. Rikardonun qəzasından 10 dəqiqə sonra marşallar trası bərpa ediblər və məşq davam edib.

15-ci döngədə növbəti dəfə fərqlənən Karlos Sayns olub. O, burada qabaq spoylerini sındırıb.

Birinci sınaq yürüşündə bəxti gətirməyənlər arasında hollandiyalı Maks Fertappen olub. “Red Bull-TAG Heuer”ə məxsus maşının mühərrikindən yanacağın axması nəticəsində Fertappen sadəcə 7 dövr edə bilib.

Nəticələrə gəldikdə halqanı ən qısa zaman ərzində qət edən Luis Hemilton olub. Onun nəticəsi 1,46,435 dəqiqə olub. Ondan 0,377 saniyə geri qalan ümumi hesab lideri Niko Rosberq olub. Monreal uğurundan ilhamlanan Valtteri Bottas yürüş zamanı yaxşı görünürdü və 3-cü yeri tutaraq Hemiltonla eyni saniyəyə malik olan sonuncu pilot olub. 

Birinci test yürüşün nəticələri
Birinci test yürüşün nəticələri

14:35 / "Formula 1"də ilk qəza

"Formula-1" Avropa Qran-prisinin birinci test yürüşündə qəza baş verib. Trekin 15-ci döngəsində “Red Bull Racing” komandasının pilotu Daniel Rikkardo dönmə əməliyyatını uğurla yerinə yetirə bilməyib.

Nəticədə onun bolidi yararsız hala düşüb. D.Rikkardonun özü isə xəsarət almayıb.

"Formula-1" Avropa Qran-prisinin birinci test yürüşündə maraqlı hadisə baş verib. Belə ki, “Haas” komandasının pilotu Esteban Qutyerres yolu səhv salıb.

Trekin 16-cı döngəsində sola dönməli olan pilot düz istiqamətdə hərəkət edib və yolun bağlı olduğunu görüb. Pilot dərhal bolidini doğru istiqamətə sürərək mübarizəyə davam edib.

“Red Bull Racing”in pilotu Daniil Kvayt da eyni aqibətlə üzləşib.

13:15 / "Formula-1"in birinci test yürüşü başlayıb

Formula-1 Avropa Qran-prisinin birinci test yürüşü başlayıb. Yürüşə hər biri iki pilotdan ibarət 11 komanda qatılıb.

“Mercedes” komandasının heyətində Luis Hamilton və Niko Rosberq “Ferrari”də Sebastian Fettel, Kimi Raykonnen, “Uilyams”ın heyətində Felipe Massa və Valtteri Bottas yürüşə qatılıblar. “Red Bull Racing” komandasında Daniel Rikkardo, Daniil Kvayt, “Force İndia”da Niko Hulkenberq və Serxio Peres, “Renualt”da isə Kevin Maqnussen ilə Colion Palmer, “Toro Rosso”nun heyətində Maks Ferstappen və Karlos Sainz, “Sauber”də Markus Erikson, Felipe Nasr, “McLaren”də Fernando Alonso və Censon Batton, “Manor”da Paskal Verlyayn və Rio Haryanto, “Haas” Roman Qrojan və Estabean Qutyerres mübarizə aparır. 

Pilotlar 1,5 saat ərzində 6 kilometrlik Bakı trekində yarışacaqlar. İkinci sərbəst yürüşə saat 17:00-da start veriləcək.

12:50 / Yarış bitdi

GP2 seriyası üzrə birinci test yarışı artıq başa çatıb.

Saat 13:00-da Formula-1 üzrə birinci test yürüşü keçiriləcək. Saat 15:00-da isə GP2 seriyası üzrə təsnifat yürüşünə start veriləcək.

12:10 / GP2 yarışı başladı

Bakıda Formula-1 Avropa Qran-prisinə start verilib. Avropa Qran-prisinə dəstək olaraq GP2 seriyasının 12-ci mövsümünün növbəti mərhələsi başlayıb. Ən güclü seriyalardan olan GP2 bir çox sürücülərin Formula-1-də debütü üçün son mərhələ hesab edilir. Builki pelotonun tərkibində yer alan Niko Rosberq və Luis Hamilton daxil olmaqla 9 pilot vaxtilə GP2 seriyasında çıxış edib və bəziləri çempion olub.

Gənc və istedadlı pilotların idarə etdiyi GP2 seriyası maşının görünüşü Formula-1 bolidini xatırlatsa da diqqətlə baxdıqdan sonra arada böyük fərq olduğu ortaya çıxır. GP2 bolidləri kiçikdir və antiqanadlar, ümumi aerodinamik elementlər daha sadədir. Onlar saatda 100 kilometr sürəti cəmi 2,9 saniyəyə yığmağa imkan verən 650 at gücündə 8 silindrli mühərriklə təchiz edilib.

Texniki işçilər avtomobili yarışa hazırlayırlar
Texniki işçilər avtomobili yarışa hazırlayırlar

2016-cı ilin GP2 təqvimi 11 yarışdan ibarətdir. Onların hamısı Formula-1 həftəsonu çərçivəsində keçirilir. Mövsüm İspaniyanın Barselona trekində start götürür və Abu-Dabidə yekunlaşır. GP2 seriyasının üçüncü mərhələsi Avropa Qran-prisinin dəstək yarışı kimi Bakı şəhər halqasında keçirilir.

Çempionatda hər birində 2 pilot olmaqla 12 kollektiv təmsil olunur. 

Hazırda GP2 seriyasının 45 dəqiqəlik sərbəst yürüşlərdən ibarət ilk mərhələsi keçirilir. Daha sonra 30 dəqiqəlik sıralama turu olacaq. Nəticədən asılı olaraq iyunun 18-də keçiriləcək ilk yarışın start düzülüşü müəyyənləşəcək (yarış 60 dəqiqə və ya 170 kilometr təşkil edir). İlk yarışın nəticəsinə əsasən, sürücülər 25, 18, 15, 12, 10, 8, 6, 4, 2 və 1 xal qazanırlar.

İyunun 19-da isə ikinci yarış keçiriləcək. Yarışda bolidlərin start düzülüşü aşağıdakı qaydada müəyyənləşəcək: iyunun 18-də keçiriləcək yarışda 1-8-ci pillələrdə yer alan sürücülər, növbəti gün tam əks qaydada start götürəcəklər. Digərləri isə birinci yarışın nəticələrinə uyğun olaraq düzüləcəklər.

İkinci yarışda xallar ilk 8 pilota verilir: 15, 12, 10, 8, 6, 4, 2, 1. Yarışın vaxtı 45 dəqiqəyə və ya 120 kilometrə qədər endirilir. Bundan əlavə, poul vəziyyəti qazanan pilot əlavə olaraq 4 xal, hər iki yarışda sürətli dövrə vuran pilotlar isə 2 xal qazanırlar.

Comments